Эрон ядро қуроли яратмайди, АҚШ эса санкция қўлламайди...

Эронлик юқори мартабали мулозимнинг “ Reuters” агентлигига маълум қилишича, АҚШ билан меморандумнинг якуний лойиҳаси Теҳроннинг ядровий дастуридан тортиб, Ҳормуз бўғозини қайта очиш ва АҚШнинг нефть санкцияларидан воз кечишигача бўлган бир қатор масалаларни ўз ичига олади.

Келишувга эришилгач, якуний битим кейинги 60 кун ичида муҳокама қилиниши кўзда тутилган.

Эронлик расмийнинг сўзларига кўра, меморандумда қуйидагилар қайд этилган:

Ҳормуз бўғози

Эрон Ҳормуз бўғозини барча тижорат кемалари учун дарҳол қайта очади, АҚШ эса Эрон портларидаги денгиз блокадасини бекор қилади.

АҚШ блокадасининг бекор қилиниши меморандум имзоланиши билан дарҳол бошланиб, 30 кун ичида якунланади.

Молия

• АҚШ якуний битим тузилгунга қадар Эронга нисбатан ҳеч қандай янги санкция жорий этмасликка розилик беради.
• Якуний келишувдан сўнг АҚШ ва БМТнинг Эронга қарши барча санкциялари келишилган жадвал асосида бекор қилинади.
• АҚШ маълум бир муддатга Эронга нисбатан нефть санкцияларидан воз кечади, бу эса Теҳронга нефтдан даромад олиш имконини яратади.
• АҚШ Эроннинг музлатилган 25 миллиард долларлик активларини озод қилишга розилик беради.
• Вашингтон минтақадаги иттифоқчилари билан мувофиқлаштирилган ҳолда 60 кун ичида Теҳрон билан музокара қилинадиган ва келишиладиган Эронни қайта тиклаш ҳамда ривожлантириш режасини тайёрлайди.

Ядро масаласи:

• Теҳрон ядровий қурол ишлаб чиқармасликка ва унга эга бўлмасликка розилик беради.
• Якуний келишувга қадар Эрон ядровий дастурининг жорий ҳолатини сақлаб қолади, уранни янада бойитишдан ҳамда ядровий объектларни кенгайтиришдан тийилади.
• АҚШ келажакдаги кенг қамровли келишув асосида Эронга ўз ҳудудида юқори даражада бойитилган уран захирасини суюлтиришга рухсат беради.
• Эроннинг ядровий дастури, уранни бойитиш фаолияти ҳамда юқори даражада бойитилган уран захирасини тасарруф этиш механизмлари меморандумдан сўнг 60 кун ичида музокара қилинади ва охирги келишувда якуний қарорга келинади.