Гўзаллик салони ходимлари ОИВ учун тест топширади

Тегишли тиббий маълумотномасиз уларга ишлашга рухсат берилмайди.

Янги тартиб президент Эмомали Раҳмон томонидан 28 август куни имзоланган ҳукумат қарори билан белгиланган. Қарор амалда экани ҳуқуқий ахборот базасида қайд этилган, бироқ унинг айнан қачон кучга киргани кўрсатилмаган.

Мажбурий тиббий кўрик қуйидаги мутахассисларга тааллуқли:

• маникюр ва педикюр усталари;
• қошларни тузатиш бўйича мутахассислар;
• юз ва тана тозалаш хизматларини кўрсатувчи ходимлар;
• татуаж ва пирсинг усталари.

Қарорга кўра, ОИВ билан яшаётган шахслар, жарроҳлик амалиётини бошдан кечирган ёки қон қуйилган фуқаролар, гиёҳванд моддаларни инъекция орқали истеъмол қилувчилар, ОИВ билан яшовчи оналардан туғилган болалар ҳамда тиббиёт ходимлари учун ҳам ОИВ тести мажбурий ҳисобланади.

Тожикистонда никоҳдан ўтмоқчи бўлган фуқаролар ҳам ОИВ бўйича тест топшириши керак. Бу талаб 2016 йилда мамлакат Оила кодексига киритилган ва ҳукумат қарорида яна мустаҳкамланган.

Никоҳдан олдинги ОИВ тести давлат тиббиёт муассасаларида бепул амалга оширилади. Қон ва бошқа биологик материаллар донорларини текшириш ҳам бепул ўтказилади.

Шунингдек, тест натижалари бўйича маълумотнома бериш муддати ҳам қисқартирилди. Аввал бунинг учун 10 иш куни ажратилган бўлса, энди ҳужжат 5 иш кунида берилиши керак.

Тожикистон Республикаси ОИВ профилактикаси ва унга қарши курашиш маркази маълумотларига кўра, 2025 йил 1 сентябрь ҳолатида мамлакатда ОИВ билан яшаётган 13 045 нафар фуқаро ҳисобда турган. Уларнинг 7 017 нафари эркаклар, 5 035 нафари аёллар, 993 нафари эса 18 ёшгача бўлган ёшлар.