Италия — Исроил ўйинига қарши норозилик намойишида 13 киши жароҳатланди

Reuters агентлигининг маълумотига кўра, воқеа учрашув якунида, шаҳар марказида ўтказилган намойиш сўнгида юз берган. Баҳсда Италия терма жамоаси Исроил устидан 3:0 ҳисобида ғалаба қозонган.

Маълумотларга кўра, жароҳатланганлар орасида икки нафар журналист ва 11 нафар хавфсизлик хизмати ходими бор. Намойишда тахминан 10 мингга яқин киши иштирок этган. Улар қўлларида “Ғазодаги қирғин учун Исроилга қизил карточка кўрсатинг” шиорлари ёзилган плакатлар билан чиққан ва Исроилни халқаро спорт мусобақаларидан четлатишни талаб қилишган.

Акция якунида бир гуруҳ намойишчи стадион томон йўналганида, полиция уларни тарқатиш учун кўздан ёш оқизувчи газ ва сув шлангларидан фойдаланган.

Blueenergy стадионида бўлиб ўтган ўйин давомида бир нечта шахс майдонга киришга уриниб кўрган, шунингдек, Фаластин байроғини кўтарган мухлисларга нисбатан ҳам чора кўрилгани маълум қилинган.