Энди Жаҳон чемпионатида 64 та жамоа иштирок этадими?

FIFA президенти Жанни Инфантинонинг айтишича, бу йилги турнирдан сўнг жаҳон чемпионатида иштирок этувчи жамоалар сонини 64 тага етказиш масаласи муҳокама қилинади.

Канада, Мексика ва АҚШда бўлиб ўтаётган 2026 йилги финал босқичида илк бор 48 та жамоа иштирок этмоқда.

Даставвал бу қарор қабул қилинганида кескин танқидларга учраган эди, бироқ 11-июнда мусобақа бошланганидан бери жамоалар сони бўйича жиддий баҳс-мунозаралар бўлмади.

“Жаҳон чемпионати бутун дунё учун бўлиши керак”

Жамоалар сонини 32 тадан кенгайтиришга эришган Инфантино Швейцариянинг “Blue Sport” телеканалига берган интервьюсида шундай деди:

“Назаримда, Жаҳон чемпионатини фақатгина, Европа ва Жанубий Америка учун эмас, балки бутун дунё учун қилиш керак. Ҳар бир халқ Жаҳон чемпионатида иштирок этиш имкониятига эга бўлиши лозим. Кўриб турганингиздек, жамоаларнинг савияси ниҳоятда юқори ва бу кўрсаткич бутун дунёда тобора ортмоқда”.

Инфантинонинг фикрича, агар кичикроқ мамлакатларга Жаҳон чемпионатида қатнашиш имкони берилмаса, уларда ривожланиш учун рағбат йўқолади.

48 жамоалик формат ўзини оқлади

FIFA президенти 48 жамоалик турнирни муваффақиятли ўтмоқда деб баҳолаб, ҳар бир жамоа юқори даражада тўп сургани, барча қитъа жамоалари гол ургани ва камида биттадан очко ишлаганини таъкидлади.

"Ўнта Африка жамоасидан тўққизтаси плей-офф босқичига чиқди. Ўтган Жаҳон чемпионатида эса Африкадан бор-йўғи бешта жамоа қатнашган эди. Ушбу натижалар барча жамоаларни қамраб олиш, уларга иштирок этиш имкониятини бериш нақадар муҳим эканини яққол кўрсатмоқда", — дея қўшимча қилди Инфантино.

Жаҳон чемпионатида иштирок этувчи жамоалар сони 1998 йилда 32 тага етказилган.

2030 йилги навбатдаги финал босқичи Марокаш, Португалия ва Испания ҳамкорлигида ўтказилса, 2034 йилги турнирга Саудия Арабистони мезбонлик қилади.