Мексика ЖЧ–2026 ўйинларини ўтказа олмаслиги мумкин

Яна 107 кундан сўнг Мексикада футбол бўйича Жаҳон чемпионатининг очилиш ўйини бўлиб ўтиши керак. Учрашувлар Мехико, Монтеррей ва Гвадалахара шаҳарларида ўтказилиши режалаштирилган. Бироқ мамлакатда авж олган зўравонликлар сабабли айрим ўйинлар тақдири сўроқ остида қолмоқда.

Гвадалахарада бир қатор муҳим баҳслар, жумладан Уругвай — Испания ва Мексика — Жанубий Корея ўйинлари ўтказилиши керак. Шунингдек, Ўзбекистон — Колумбия учрашуви ҳам Мексикада бўлиши режалаштирилган.

Сўнгги кунларда мамлакатнинг айрим ҳудудларида вазият кескинлашган. Гвадалахара ва Пуэрто-Вальярта шаҳарларида ёнғинлар, транспорт ҳаракати тўхташи ва рейслар бекор қилиниши ҳолатлари кузатилмоқда. Дўконлар ва мактаблар ёпилган. АҚШ ва Германия ўз фуқароларига эҳтиёт бўлиш ва заруратсиз сафар қилмасликни тавсия қилган.

Зўравонликлар “Эль Менчо” номи билан танилган “Халиско янги авлод” (CJNG) картели раҳбарининг махсус операцияда ҳалок бўлиши ортидан бошланган. Қатор штатларда автомобиллар ёқилган, йўллар тўсилган. Расмий маълумотларга кўра, ҳуқуқ-тартибот идораларининг 27 нафар ходими ҳалок бўлган.

Мексика президенти Клаудия Шейнбаум вазият ҳукумат назорати остида эканини ва асосий йўллар қайта очилганини маълум қилди.

Шунга қарамай, хавфсизлик масаласи ЖЧ–2026 ўйинларининг Мексикада режага мувофиқ ўтиши бўйича саволларни очиқ қолдирмоқда.