Meksika JCh–2026 oʻyinlarini oʻtkaza olmasligi mumkin

Yana 107 kundan soʻng Meksikada futbol boʻyicha Jahon chempionatining ochilish oʻyini boʻlib oʻtishi kerak. Uchrashuvlar Mexiko, Monterrey va Gvadalaxara shaharlarida oʻtkazilishi rejalashtirilgan. Biroq mamlakatda avj olgan zoʻravonliklar sababli ayrim oʻyinlar taqdiri soʻroq ostida qolmoqda.

Gvadalaxarada bir qator muhim bahslar, jumladan Urugvay — Ispaniya va Meksika — Janubiy Koreya oʻyinlari oʻtkazilishi kerak. Shuningdek, Oʻzbekiston — Kolumbiya uchrashuvi ham Meksikada boʻlishi rejalashtirilgan.

Soʻnggi kunlarda mamlakatning ayrim hududlarida vaziyat keskinlashgan. Gvadalaxara va Puerto-Valyarta shaharlarida yongʻinlar, transport harakati toʻxtashi va reyslar bekor qilinishi holatlari kuzatilmoqda. Doʻkonlar va maktablar yopilgan. AQSh va Germaniya oʻz fuqarolariga ehtiyot boʻlish va zaruratsiz safar qilmaslikni tavsiya qilgan.

Zoʻravonliklar “El Mencho” nomi bilan tanilgan “Xalisko yangi avlod” (CJNG) karteli rahbarining maxsus operatsiyada halok boʻlishi ortidan boshlangan. Qator shtatlarda avtomobillar yoqilgan, yoʻllar toʻsilgan. Rasmiy maʼlumotlarga koʻra, huquq-tartibot idoralarining 27 nafar xodimi halok boʻlgan.

Meksika prezidenti Klaudiya Sheynbaum vaziyat hukumat nazorati ostida ekanini va asosiy yoʻllar qayta ochilganini maʼlum qildi.

Shunga qaramay, xavfsizlik masalasi JCh–2026 oʻyinlarining Meksikada rejaga muvofiq oʻtishi boʻyicha savollarni ochiq qoldirmoqda.