Мянмада портлаш: 55 киши ҳалок бўлди, ўнлаб одамлар жароҳатланди

Хабарларга кўра, Мянманинг Каунг Тат қишлоғида юз берган портлаш оқибатида камида 55 киши ҳалок бўлган. 

Қўзғолончилар армиясининг таъкидлашича, портлашга тоғ-конь ишларида фойдаланиш учун сақланаётган моддаларнинг тасодифан портлаб кетиши сабаб бўлган.

Айни пайтда Мянма ҳарбийлари билан сулҳ тузган ва Хитой чегараси яқинидаги ушбу қишлоқни назорат қилаётган Таанг Миллий Озодлик Армияси (ТНЛА) қурбонлар бўлганини тасдиқлади, бироқ уларнинг аниқ сонини маълум қилмади.

BBC ҳамда маҳаллий “Shwe Phee Myay” ахборот агентлиги камида 55 киши, жумладан, 25 нафар аёл ва 30 нафар эркак ҳалок бўлгани, яна ўнлаб одамлар жароҳатлангани ҳақида хабар берди.

“Таанг Миллий Озодлик Армияси портлаш оқибатида ҳаётдан кўз юмганлар, жароҳат олганлар ва зарар кўрганларнинг оила аъзоларига чуқур ҳамдардлик билдиради”, — дейилади гуруҳнинг Тelegram'даги постида.

Унда маҳаллий вақт билан тушда (Гринвич бўйича 05:30) содир бўлган портлаш юзасидан тергов олиб борилаётгани ва айбдор деб топилган ҳар қандай шахс жавобгарликка тортилиши маълум қилинган. 

Шунингдек, портлашдан жабр кўрган оилаларга имкон қадар тезроқ гуманитар ёрдам, тиббий кўмак ва реабилитация ишлари тақдим этилиши қўшимча қилинган.