АҚШ Эроннинг ҳарбий объектларига янги зарбалар берди

Баёнотга кўра, операция АҚШнинг Яқин Шарқда жойлашган ҳарбий кучларига нисбатан амалга оширилган ҳужумга жавоб сифатида ўтказилган. АҚШ ҳарбийлари зарбалар давомида Ислом инқилоби муҳофизлари корпуси (КСИР)га тегишли қўмондонлик марказлари, ракета ва дронлар учириш объектлари ҳамда соҳил қўриқлаш инфратузилмалари нишонга олинганини билдирди.

Reuters агентлиги Эрон оммавий ахборот воситаларига таяниб, мамлакат жанубидаги бир қатор ҳудудларда портлаш овозлари эшитилганини хабар қилди. Давлат телевидениеси Ахвоз шаҳрида, маҳаллий Tasnim агентлиги эса Кешм оролида портлашлар бўлганини маълум қилди. Шунингдек, Россия иштирокида қурилаётган Бушеҳр атом электр станцияси жойлашган ҳудудда ҳам портлаш ҳақида хабарлар тарқалган.

BBC маълумотига кўра, бу АҚШ президенти Дональд Трамп ўзаро ҳужумлардан кейин музокараларга имконият бериш мақсадида бомбардимонларни тўхтатганини эълон қилганидан кейинги илк зарбалар ҳисобланади.

Вашингтон янги операцияни Эроннинг Иорданиядаги АҚШ ҳарбий базасига ракета ҳужумига жавоб деб баҳоламоқда. АҚШ томони ўша ҳужум пайтида барча ракеталар тутиб қолинганини билдирган.

Эрон ҳукумати эса АҚШ амалга оширган зарбаларни халқаро ҳуқуқнинг бузилиши сифатида баҳолаб, уларни кескин қоралади.