Норвегия монархияни сақлаб қолди

Расмий маълумотларга кўра, 169 нафар депутатдан 141 нафари монархияни қолдириш учун овоз берган, 26 нафари эса республикага ўтишни қўллаб-қувватлаган.

Монархия тарафдорлари қироллик мамлакат барқарорлигига хизмат қилаётганини айтади. Уларга кўра, қироллик сиёсатдан холи бўлиб, Норвегияда 1905 йилдан бери сақланиб келмоқда. Республика тарафдорлари эса ҳокимият сайланган парламент қўлида бўлиши кераклигини таъкидлайди.

Шу куни Ослода кронпринцесса Метте-Маритнинг ўғли Мариус Борг Хёйбига нисбатан суд жараёни бошланди. У бир қатор жиноятларда, жумладан зўрлашда айбланмоқда. Айбловларнинг бир қисми бўйича у ўз айбини тан олмади.

Мариус Борг Хёйби қироллик унвонига эга эмас ва тахтга даъвогар ҳисобланмайди. Унга 10 йилгача қамоқ жазоси тайинланиши мумкин.

Сўнгги сўровларга кўра, кронпринцессага бўлган жамоатчилик ишончи ҳам камайган.