Озарбайжонда мухолифат етакчиси Али Каримли “давлат тўнтаришига уриниш”да айбланмоқда

Озарбайжон демократик мухолифатининг етакчи вакили Али Каримли Жиноят кодексининг 278.1-моддаси (ҳокимиятни зўравонлик йўли билан эгаллаш, давлатнинг конституциявий тузумини куч билан ўзгартиришга қаратилган ҳаракатлар) билан айбланмоқда.

Адвокатларининг сўзларига кўра, у айбдор деб топилса, 12 йилдан 20 йилгача озодликдан маҳрум этилиши мумкин.

2025 йил 1 декабрдан буён ҳибсда сақланаётган собиқ давлат котиби Каримли бу айбловларни “бутунлай уйдирма ва сиёсий сабабларга асосланган” дея рад этди.

Али Каримли бир неча ўн йиллардан буён Озарбайжон республикасини бошқариб келаётган Алиевлар режимининг бошоғриғига айланиб қолган.

Али Каримли адвокатлари орқали France24 нашрига интервью бераркан, унга нисбатан ҳеч қандай жиддий тергов олиб борилмаётганини таъкидлади.

“Улар нималар тўқиётгани, буни қандай амалга ошираётгани ҳақида на мен, на адвокатларим маълумотга эгамиз. Мени ёлғон айбловлар билан қамоққа ташлашларига ягона сабаб – сиёсий эътиқодим ва уни ҳимоя қилишга бўлган қатъиятимдир. Мен ҳеч қандай жиноят, ҳатто кичик маъмурий ҳуқуқбузарлик ҳам содир этмаганман. Айнан шунинг учун ҳам ўзимни виждон маҳбуси деб ҳисоблайман”, – деди Али Каримли.

Ҳибс муддати узайтирилди

Али Каримли 10 июнь куни Бокуда “давлат тўнтаришига уриниш” айблови бўйича суд қилиниши керак эди. Ҳозирча суд ҳақида батафсил маълумотлар йўқ.

Оху.аз нашрининг хабар беришича, суд Али Каримлининг ҳибс муддатини яна 5 ойга узайтирган.