Путиннинг дўсти Домодедово аэропортига эгалик қилади

 Бу ҳақда RBK хабар берди.

Маълум бўлишича, аэропорт 2025 йилда собиқ эгаси Дмитрий Каменшикдан тортиб олиниб, давлат тасарруфига ўтказилган эди. 29 январь куни ўтган аукционда «Домодедово» «Шереметьево» аэропортига қарашли «Перспектива» МЧЖга сотилди.

«Шереметьево» улушларининг 30 фоизи давлатга, 66 фоизи эса TPS Avia Holding трастига тегишли. Ушбу траст 2022 йил охирида Россиянинг Русский оролида қайта рўйхатдан ўтказилган. Траст акцияларининг 34 фоизи Ротенбергга, қолган қисми эса тадбиркорлар Александр Пономаренко ва Александр Скоробогатко оилаларига тегишли.

Аукционда «Домодедово» 66,1 миллиард рубльга сотилган. Бу аэропортнинг бошланғич нархи — 132 миллиард рублдан икки баробар арзон. Савдоларда Ротенберг билан боғлиқ компаниядан ташқари фақат «Внуково» аэропорти тузилмаси қатнашган.

74 ёшли Аркадий Ротенберг ёшлигида Владимир Путин билан дзюдо тўгарагида танишган. Украинага қарши уруш бошланганидан сўнг у хусусий активларни давлат томонидан тортиб олиш жараёнидан энг кўп фойда кўрган шахслардан бирига айланган. Бу жараёнда умумий қиймати 4,5 триллион рубль бўлган активлар давлат назоратига ўтган.

Ротенберг, шунингдек, «Росхим» холдингига қарашли бир қатор кимё корхоналарини ҳам сотиб олган ҳамда «Салаватнефтемаш» корхонасини бошқарувига олган. 2025 йил охирига келиб, унга ўтган активлар қиймати 168 миллиард рублга етган.

Россия Транспорт вазирлиги янги эгадан аэропортда тўпланиб қолган муаммоларни ҳал қилишни кутмоқда. «Домодедово»нинг қарзи 70 миллиард рубльни ташкил этади, унинг ярми хорижий валютада. Мутахассислар ҳисобича, 2026 йилда кредит тўловлари аэропорт даромадининг қарийб чорак қисмини ташкил этади. 2025 йилда эса аэропорт 10 миллиард рубль зарар кўрган.