Россияда мигрантлар содир этган жиноятлар 40 фоизга камайди

Россия Ички ишлар вазири Владимир Колокольцевнинг айтишича, 2026 йилнинг январь–сентябрь ойларида хориж фуқаролари Россияда 20 мингга яқин жиноят содир этган. Бу ўтган йилнинг мос даврига нисбатан 40 фоизга камдир.

Вазирнинг маълумотларига кўра, тўққиз ой ичида Россияга қарийб 7 миллион хорижлик кириб келган — бу ўтган йилгидан 10 фоизга кам. 1 октябрь ҳолатига кўра, мамлакатдаги мигрантлар сони 6 миллионтани ташкил этади.

Назорат остидаги шахслар реестрида айни пайтда 820 минг чет эл фуқароси рўйхатда турибди, уларнинг 120 минг нафари вояга етмаганлардир. 670 мингга яқин хорижлик эса Россияда яшаш гувоҳномаси ёки вақтинча яшаш рухсатномасига эга.

Шу билан бирга, жорий йилда вазирлик ўтган йилга нисбатан 5 баравар кўп яшаш гувоҳномасини ва 18 баравар кўп вақтинча яшаш рухсатномасини бекор қилган.

2026 йилда Россиядан 120 минг хорижлик чиқариб юборилган — бу кўрсаткич ҳам бир йил олдингига нисбатан икки баравар кўп.

Бундан ташқари, Россияга кириши уч йилдан ўн йилгача бўлган муддатга тақиқланган хорижликлар сони қарийб 290 мингтага етган.

Муқобил меҳнат бозорлари изланмоқда

Россияга ишлагани бораётган ўзбекистонликлар сони ҳам камаймоқда. Жумладан, жорий йилда ишлаш мақсадида Россия чегарасини кесиб ўтган ўзбекистонликлар сони ўтган йилгига нисбатан 13 фоизга пасайган.

Бунга Кремль жорий этаётган турли чекловлар, шунингдек, муқобил миграция тармоқларининг кенгайиши сабаб бўлмоқда.

Сўнгги бир неча йил давомида Марказий Осиё давлатлари раҳбарлари, хусусан, Ўзбекистон президенти Шавкат Мирзиёев меҳнат қилиш учун хорижга чиқмоқчи бўлган фуқароларни Россиядан бошқа давлатларга йўналтиришга фаол ҳаракат қилмоқда.

Шунга қарамай, Россия ҳамон ўзбекистонлик мигрантларнинг асосий манзили бўлиб қолмоқда. 2026 йилнинг биринчи ярмида Марказий Осиёдан келган меҳнат мигрантларининг 1,1 миллион нафари Ўзбекистон фуқароларига тўғри келган. Ўзбекистон бу борада бошқа давлатлар орасида етакчига айланди.