Россия нефть ишлаб чиқариш ҳажми январдан бери 940 минг баррелга камайиб кетди

Халқаро энергетика агентлиги (IEA) Россиянинг 2026 йил учун нефть қазиб олиш прогнозини яна 125 минг баррелга қисқартириб, кунига 8,7 млн баррелга туширди. Агентликнинг янги таҳлили Россия энергетика инфратузилмасига, айниқса нефтьни қайта ишлаш объектларига берилаётган Украина дрон ҳужумлари кучайиб бораётган бир пайтга тўғри келмоқда.

Россиянинг хом нефть ишлаб чиқариши август ойида кунига 8,36 млн баррелни ташкил қилган. Бу июль ойидаги кўрсаткичдан 200 минг баррелга, январь ойидагидагидан эса 940 минг баррелга кам. Августдаги кўрсаткич 2025-йилнинг шу ойига нисбатан ҳам 695 минг баррелга паст бўлган.

Босим кучаймоқда

Украина Россиянинг нефтьни қайта ишлаш заводлари, ёқилғи терминаллари ва бошқа энергетика объектларига мунтазам равишда дрон ҳужумларини амалга оширмоқда. Бундай зарбалар нафақат алоҳида заводларнинг фаолиятини вақтинча тўхтатиши, балки мамлакатдаги умумий қайта ишлаш қувватларини ҳам қисқартириши шубҳасиз.

IEA маълумотларига кўра, Россияда нефть маҳсулотларини ишлаб чиқариш ва экспорт қилиш ҳам оғир босимга дуч келмоқда. Россиянинг айрим ҳудудларида аввалроқ кузатилган бензин танқислигини ҳисобга олсак, нефтьни қайта ишлашдаги узилишлар ички ёқилғи бозорига катта таъсир ўтказади.

Россия учун муаммо фақат ишлаб чиқариш ҳажмининг камайишида эмас. Нефть – мамлакат бюджети ва экспорт даромадларининг йирик манбаларидан бири. Шу сабабли қазиб олиш ва қайта ишлашдаги узоқ узилишлар давлат даромадларини кескин туширади.

“Reuters” агентлиги қўлга киритган ҳукумат прогнози лойиҳасига кўра, Россия Украина билан зиддият сабабли бу йилги нефть қазиб олиш кўрсаткичини сўнгги 17 йилдаги энг паст даражага туширган. Шунингдек, 2026–2027 йиллар учун ёқилғи экспорти режасини қайта кўриб чиққан. Бу шундан дарак берадики, Украина зарбаларининг Россия энергетика секторига таъсири тобора кенгаймоқда.