Вашингтон Москвага жавоб берди: дипломатлар Киевда қолади

Рубионинг сўзларига кўра, АҚШнинг Киевдаги элчихонаси фаолиятини давом эттирмоқда ва Давлат департаменти дипломатик ваколатхоналар хавфсизлигини ҳар куни баҳолаб бормоқда.

«Биз у ерда элчихонага эгамиз ва у ерда қолиш хавфсиз ёки хавфсиз эмаслигини ўзимиз ҳал қиламиз», — деди Рубио.

Унинг таъкидлашича, Россия дипломатларни Киевни тарк этишга чақиришни бир неча ойдан бери давом эттирмоқда. Агар вазият америкалик дипломатларни эвакуация қилишни талаб қиладиган даражага етса, Вашингтон тегишли чораларни кўради.

Ҳозирча Рубио АҚШ дипломатларини Киевдан эвакуация қилиш зарурати йўқлигини айтди.

Аввалроқ Россия Ташқи ишлар вазирлиги хорижий фуқаролар, жумладан дипломатик ваколатхоналар ходимларини Киевни тарк этишга чақирган ва Украина пойтахтига янги зарбалар берилиши мумкинлигидан огоҳлантирган.

Шу билан бирга, Европа Иттифоқининг қатор давлатлари элчихоналари Киевдаги фаолиятини давом эттиришини билдирган.