Россияда мигрантларни ишдан бўшатиш тартиби соддалаштирилди

Тегишли ўзгартишлар Меҳнат кодексига киритилди.

Аввал хорижий фуқаролар фақат федерал қонунлар, президент фармонлари ёки ҳукумат қарорларида белгиланган асослар бўйича ишдан бўшатилиши мумкин эди. Энди бу рўйхатга минтақавий ҳукумат қарорлари ҳам қўшилди. Бу эса, агар ҳудудда мигрантлар сонига чеклов белгиланса, иш берувчилар унга қатъий риоя этиши шартлигини англатади.

Давлат Думаси депутати Игор Антропенко маълум қилишича, белгиланган минтақавий квотадан ошиб кетиш 800 мингдан 1 миллион рублгача жаримага сабаб бўлиши мумкин. Шунингдек, компания фаолияти 90 кунгача тўхтатилиши эҳтимоли ҳам бор.

Шу боис, лимитдан ошиб кетилган тақдирда, кўплаб иш берувчилар хорижий ишчилар билан тузилган меҳнат шартномаларини бекор қилишга мажбур бўлади.

2025 йил ноябрь ойида ҳукумат 2026 йил учун квоталарни тасдиқлаган эди. Унга мувофиқ, жорий йилда виза асосида келган 278 900 нафар хорижий ишчига рухсат берилади. Кириш таклифномалари ва ишлаш рухсатномалари учун ҳам худди шунча миқдорда квота ажратилган.

Энг катта квоталар ишлаб чиқариш ва қурилиш соҳаларига тўғри келади. Жумладан, озиқ-овқат, ёғочни қайта ишлаш, тўқимачилик ва кийим-кечак саноатида 71 088 нафар, қурилиш соҳасида 55 312 нафар, металлга ишлов бериш ва машинасозликда 45 391 нафар хорижий ишчига рухсат берилган.

Муҳим жиҳат: агар сиз ишлаётган минтақада чекловлар жорий этилса, иш берувчи меҳнат шартномасини қонуний асосда бекор қилиши мумкин. Шунинг учун ўз ҳудудингиздаги вазиятни олдиндан ўрганиш ва расмий маълумотларни мунтазам кузатиб бориш тавсия этилади.