Россияда ўзбекистонлик мигрант ОМОНчилар томонидан калтаклаб ўлдирилди

Манбаларга кўра, воқеа 12 декабрь куни Хабаровскда содир бўлган. Кучишлатар тузилмалар вакиллари шаҳардаги кафелардан бирига кириб, у ерда бўлган бир гуруҳ Ўзбекистон фуқароларига нисбатан куч ишлатган.

Ҳодиса оқибатида икки нафар Ўзбекистон фуқароси оғир тан жароҳати олиб шифохонага ётқизилган. Уларнинг бири бир неча кундан сўнг вафот этган, иккинчи фуқаро эса ҳозирда оғир аҳволда даволанмоқда.

Маълум қилинишича, марҳум Самарқанд вилояти Каттақўрғон тумани Жумавой қишлоғида туғилган.

Ҳолат Ўзбекистоннинг Владивостокдаги Бош консулхонаси ва Миграция агентлиги томонидан назоратга олинган. Бош консулхона марҳумнинг яқинлари билан доимий алоқада бўлиб, зарур консуллик ва амалий ёрдам кўрсатмоқда.
Фуқаронинг жасадини Ўзбекистонга қайтариш бўйича ишлар олиб борилмоқда.

Шунингдек, Хабаровск ўлкаси Прокуратураси ва Тергов бошқармасига, шу билан бирга Россия Федерацияси Ташқи ишлар вазирлигининг Хабаровскдаги ваколатхонасига юборилган ноталар орқали ҳолатни холисона ва қонуний тартибда ўрганиш сўралган.