Сингапурда ўрмонларни уй-жой қурилиши учун кесиш режаси норозиликларга сабаб бўлди

Бу ҳақда Al Jazeera хабар берди.

Норозиликлар мамлакатдаги ердан фойдаланиш, уй-жойга бўлган эҳтиёж ва табиатни муҳофаза қилиш масалалари атрофида кенг муҳокамага сабаб бўлган.

Мажу ўрмонининг катта қисми ўзлаштирилади

Сингапур Уй-жой ва тараққиёт кенгаши Мажу ўрмонининг 23 гектар майдонидан тахминан 15 гектарини тозалаб, Sunset Way ҳудудида уй-жойлар қуриш режасини эълон қилган.

Шунингдек, шаҳарнинг жанубида жойлашган Гиллман ўрмонининг камида 10 гектарини ўзлаштириш режалаштирилган.

Бу қарор табиатни муҳофаза қилиш тарафдорлари ва маҳаллий аҳоли орасида норозиликларга сабаб бўлди. Фаоллар ўрмонларнинг йўқ қилиниши ҳайвонот ва ўсимлик дунёсига жиддий зарар етказишидан хавотирда.

60 мингдан ортиқ киши петицияларни қўллаб-қувватлади

Мазкур режаларга қарши петицияларга 60 мингдан ортиқ киши имзо қўйган.

16 август куни эса Сингапурдаги Speakers’ Corner майдонида ўрмонларни сақлаб қолишни талаб қилган митинг бўлиб ўтди. Унда 2 мингдан ортиқ киши қатнашди.

Сингапурда Speakers’ Corner фуқаролар рухсатномасиз очиқ йиғилиш ва чиқишлар ўтказиши мумкин бўлган ягона жой ҳисобланади.

Фаолларнинг таъкидлашича, бу норозиликлар мамлакатда шаҳарсозлик ва давлат режаларига нисбатан жамоатчиликнинг очиқ муносабати кучайиб бораётганини кўрсатади.

Ўрмонларда ноёб ҳайвонлар яшайди

Расмий экологик баҳолашларга кўра, Гиллман ўрмонида 178 турдаги ҳайвон, Мажу ўрмонида эса 113 тур мавжуд.

Улар орасида йўқолиб кетиш хавфи юқори бўлган сомонбош булбул ва Сунда панголини каби ҳайвонлар ҳам бор.

Мутахассислар Сингапурда аҳоли ва инфратузилма учун ерга бўлган талаб юқори эканини тан олган ҳолда, табиий ҳудудларни сақлаб қолиш ҳам муҳимлигини таъкидламоқда.

Ҳукумат қўшимча яшил ҳудудларни сақлаб қолишга ваъда берди

Сингапур ҳукумати уй-жойга бўлган талаб юқорилиги сабабли мавжуд ер ресурсларидан самарали фойдаланиш зарурлигини билдирган.

Мамлакат Миллий тараққиёт вазири ўринбосари Элвин Таннинг таъкидлашича, Сингапурнинг ер майдони чекланган ва аҳоли учун уй-жой қуришда танлов имкониятлари катта давлатларга қараганда камроқ.

Шу билан бирга, ҳукумат норозиликлардан сўнг дастлабки режага нисбатан кўпроқ яшил ҳудудни сақлаб қолишини маълум қилди. Бу эса ўрмонларда қуриладиган уй-жойлар сони қисқариши мумкинлигини англатади.

Бироқ табиатни муҳофаза қилиш тарафдорлари уй-жой қурилиши ва яшил ҳудудларни асрашни бир-бирига қарама-қарши қўйиш нотўғри эканини таъкидламоқда.

Сингапурда аҳоли сони 2025 йилда рекорд даражага — 6,11 миллион кишига етган. Ҳукумат эса мамлакатда уй-жойга бўлган талабни қондириш билан бирга, «табиат ичидаги шаҳар» концепциясини ҳам сақлаб қолишга интилаётганини билдирган.