Singapurda o'rmonlarni uy-joy qurilishi uchun kesish rejasi norozliklarga sabab bo'ldi

Bu haqda Al Jazeera xabar berdi.

Norozliklar mamlakatdagi yerdan foydalanish, uy-joyga bo'lgan ehtiyoj va tabiatni muhofaza qilish masalalari atrofida keng muhokamaga sabab bo'lgan.

Maju o'rmonining katta qismi o'zlashtiriladi

Singapur Uy-joy va taraqqiyot kengashi Maju o'rmonining 23 gektar maydonidan taxminan 15 gektarini tozalab, Sunset Way hududida uy-joylar qurish rejasini e'lon qilgan. Shuningdek, shaharning janubida joylashgan Gillman o'rmonining kamida 10 gektarini o'zlashtirish rejalashtirilgan.

Bu qaror tabiatni muhofaza qilish tarafdorlari va mahalliy aholi orasida norozliklarga sabab bo'ldi. Faollar o'rmonlarning yo'q qilinishi hayvonot va o'simlik dunyosiga jiddiy zarar yetkazishidan xavotirda.

60 mingdan ortiq kishi petitsiyalarni qo'llab-quvvatladi

Mazkur rejalarga qarshi petitsiyalarga 60 mingdan ortiq kishi imzo qo'ygan. 16-avgust kuni esa Singapurdagi Speakers' Corner maydonida o'rmonlarni saqlab qolishni talab qilgan miting bo'lib o'tdi, unda 2 mingdan ortiq kishi qatnashdi.

Singapurda Speakers' Corner fuqarolar ruxsatnomasiz ochiq yig'ilish va chiqishlar o'tkazishi mumkin bo'lgan yagona joy hisoblanadi. Faollarning ta'kidlashicha, bu norozliklar mamlakatda shaharsozlik va davlat rejalariga nisbatan jamoatchilikning ochiq munosabati kuchayib borayotganini ko'rsatadi.

O'rmonlarda noyob hayvonlar yashaydi

Rasmiy ekologik baholashlarga ko'ra, Gillman o'rmonida 178 turdagi hayvon, Maju o'rmonida esa 113 tur mavjud. Ular orasida yo'qolib ketish xavfi yuqori bo'lgan somonbosh bulbul va Sunda pangolini kabi hayvonlar ham bor.

Mutaxassislar Singapurda aholi va infratuzilma uchun yerga bo'lgan talab yuqori ekanini tan olgan holda, tabiiy hududlarni saqlab qolish ham muhimligini ta'kidlamoqda.

Hukumat qo'shimcha yashil hududlarni saqlab qolishga va'da berdi

Singapur hukumati uy-joyga bo'lgan talab yuqoriligi sababli mavjud yer resurslaridan samarali foydalanish zarurligini bildirgan. Mamlakat Milliy taraqqiyot vaziri o'rinbosari Elvin Tanning ta'kidlashicha, Singapurning yer maydoni cheklangan va aholi uchun uy-joy qurishda tanlov imkoniyatlari katta davlatlarga qaraganda kamroq.

Shu bilan birga, hukumat norozliklardan so'ng dastlabki rejaga nisbatan ko'proq yashil hududni saqlab qolishini ma'lum qildi. Bu esa o'rmonlarda quriladigan uy-joylar soni qisqarishi mumkinligini anglatadi.

Biroq tabiatni muhofaza qilish tarafdorlari uy-joy qurilishi va yashil hududlarni asrashni bir-biriga qarama-qarshi qo'yish noto'g'ri ekanini ta'kidlamoqda. Singapurda aholi soni 2025-yilda rekord darajaga — 6,11 million kishiga yetgan, hukumat esa mamlakatda uy-joyga bo'lgan talabni qondirish bilan birga, "tabiat ichidagi shahar" kontseptsiyasini ham saqlab qolishga intilayotganini bildirgan.