Тажовузкор риторика давом этмоқда: навбат Валуевга

Энди эса улар ортидан собиқ спортчи, ҳозирда Россия Федерацияси Давлат Думаси депутати ҳамда Туризм қўмитаси раиси биринчи ўринбосари Николай Валуев чиқди. У бошқа давлатларда, жумладан собиқ Иттифоқ мамлакатларида ҳам “махсус ҳарбий амалиётлар” ўтказилиши мумкинлиги ҳақида дағдағали баёнот берди.

Валуевнинг айтишича, Россияни ҳали кўплаб “махсус операциялар” кутмоқда. У Александр Дугин фикрларини қўллаб-қувватлаб, Россия 30 йил давомида постсовет республикаларига нисбатан “яхши гапириш” самара бермаганини таъкидлаган. Унинг фикрича, энди “қамчи” керак.

Шунингдек, Валуев ёшларни ҳарбий ҳаракатларга тайёрлаш зарурлигини билдириб, “зумерлар”ни спорт залларига бориб, жисмоний тайёргарлик кўришга чақирди. Унинг айтишича, яқин келажакда улар учун “қаҳрамонлик кўрсатиш даври” бошланади. Валуев жамиятда фақат “ғалабага ҳисса қўшган ёки бунга тайёр бўлган” шахсларгина тўлиқ ҳуқуқларга эга бўлиши керак, деган кескин фикрни ҳам илгари сурди.

Аввалроқ Россия Ташқи ишлар вазирлиги расмий вакили Мария Захарова телебошловчи Владимир Соловьёвнинг Россия ташқи сиёсатига оид баёнотларига изоҳ бериб:

“Бу журналистнинг шахсий фикри. У хусусий ‘Solovyov LIVE’ каналида билдирилган. Мен иқтибосларни ўқидим ва улар контекстдан юлиб олинмаган. Бунга жавоб бериш менинг ваколатимга кирмайди”, деган эди.

Бироқ эндиликда бу тажовузкор фикрлар журналист эмас, балки Россия ҳукуматда амалда фаолият олиб бораётган сиёсатчи тилидан янграмоқда. Россия Ташқи ишлар вазирлиги бу ҳолатга қандай муносабат билдириши ҳали номаълум.