Тожикистон чегарачилари ва «Толибон» ўртасида қуролли тўқнашув юз берди

25 октябрь куни Тожикистон ва Афғонистон чегарасида қуролли тўқнашув содир бўлди. «Asia-Plus» нашри хабарига кўра, ҳодиса Тожикистоннинг Шамсиддин Шоҳин тумани ва Афғонистоннинг Бадахшон вилояти Шаҳри Бузург тумани ўртасида жойлашган Дованг қишлоғида рўй берган.

Дастлабки маълумотларга кўра, можаро Панж (Амударё) дарёси ўзанининг ўзгариши билан боғлиқ тортишувлардан келиб чиққан. Бу масала аввал ҳам икки давлат ўртасида низоларга сабаб бўлган.

ОАВ хабар беришича, отишма хорижий, жумладан Хитой компаниялари иш олиб борадиган олтин қазиб олиш ҳудудида содир бўлган. Манбалар таъкидлашича, тўқнашув қурбонларга олиб келган, аммо ҳалок бўлганлар ва жароҳатланганларнинг аниқ сони ҳозирча маълум эмас. Ҳар икки томондан йўқотишлар бўлгани ёки йўқлигига ойдинлик киритилмаган.

Тожикистон расмийлари ҳам, «Толибон» ҳаракати вакиллари ҳам ҳозирча воқеага расмий изоҳ бермаган.

Маълумот учун, Тожикистон «Толибон» билан тўғридан-тўғри алоқалар йўқлигини эълон қилган Марказий Осиёдаги ягона давлат ҳисобланади. Душанбе Кобул ҳукуматини инклюзив ҳукумат тузишга ва инсон ҳуқуқларига риоя қилишга чақиради.

Сиёсий позицияга қарамай, икки давлат ўртасида савдо-иқтисодий алоқалар ва гуманитар ҳамкорлик давом этмоқда. 

 Шунингдек, Тожикистоннинг Афғонистондаги элчихонаси ва консуллиги ҳам фаолият юритмоқда.