Тожикистон ТИВ Россияда содир этилган фожиа юзасидан нота топширди

Бу ҳақда Тожикистоннинг Россиядаги элчихонаси маълум қилди.

Баёнотга кўра, Тожикистон ТИВ 2025 йил 16 декабрь куни Москва вилояти Одинцово шаҳар округи, Горки-2 посёлкасида жойлашган Успенская ўрта мактабида миллий адоват таъсирида содир этилган ҳужумни қатъиян қоралайди. Ҳужум натижасида Тожикистон Республикаси фуқароси, ушбу мактабнинг 4-синф ўқувчиси Алиев Қобилжон воқеа жойида ҳалок бўлган.

Шу муносабат билан Россия Федерациясининг Тожикистондаги элчиси Семён Григорьев ТИВга чақирилиб, унга ҳодисани зудлик билан холис ва беғараз тарзда тергов қилиш ҳамда барча айбдор шахсларни қонун доирасида тўлиқ жавобгарликка тортиш талаби акс этган нота топширилган.

Бундан ташқари, Тожикистоннинг Россия Федерациясидаги элчихонасига марҳум боланинг оила аъзолари билан доимий алоқада бўлиш ҳамда мазкур ишни назоратга олиш топширилган.

Маълумотларга кўра, ҳужумни содир этган 15 ёшли Тимофей К. қўлга олинган. Тергов жараёнида унинг телефонида ҳалок бўлган ўқувчининг сурати ва селфилар аниқланган. Шунингдек, ўсмир экстремистик иқтибослар ҳамда ўнг радикал ташкилотлар номлари туширилган каскасини суратга олгани маълум бўлган. Хусусан, каскада «Sygaown» ёзуви қайд этилган бўлиб, у 2022 йилда АҚШда содир этилган оммавий отишмага ишора қилмоқда.