updated: 22.03.2026, 14:20

Тожикистонда фолбин ва сеҳргарларга борганлик учун 475 долларгача жарима жорий этилди

Тожикистонда фолбин ва сеҳргарларга мурожаат қилганлик ва уларнинг хизматларидан фойдаланганлик учун маъмурий жавобгарлик жорий этилди. Бундай хизматларга мурожаат қилган фуқаролар 3750 сомоний (396 доллар атрофида)дан 4500 сомоний (475 доллар атрофида)гача жаримага тортилиши мумкин. Бу ҳақда Тожикистон Ички ишлар вазирлигининг Душанбе бўйича бошқармаси хабар қилди.

Жаҳон

25.08.2025, 17:21

Lotinchada

Улашиш:

Tojikistonda folbin va sehrgarlarga borganlik uchun 475 dollargacha jarima joriy etildi

ASIA-Plus нашрининг ёзишича, Маъмурий ҳуқуқбузарликлар тўғрисидаги кодексига 31 июль куни бу тузатишлар кучга кирган, бироқ бу ҳақда эндигина маълум бўлмоқда.

Нашрнинг таъкидлашича, сўнгги бир йил ичида Тожикистон расмийлари фолбин ва сеҳргарлар ҳамда уларнинг мижозларига қарши курашни кучайтирган.

2024 йилнинг ёзида Тожикистон Ички ишлар вазирлиги фолбин ва сеҳргарларга бораётган шахслар органлар томонидан чақиртирилиши, шунингдек, уларнинг исмлари ва фотосуратларини идоранинг маълумотлар базасига киритилиши ҳақида огоҳлантириш берганди.

Ўшанда мамлакат расмийлари “бу чора-тадбирнинг мақсади хурофот, фолбинлар ва сеҳргарлар хизматидан фойдаланишнинг олдини олиш эканини, чунки баъзи фуқаролар уларга мурожаат қилиб, сеҳр-жоду ва афсунгарликнинг тарқалишига ҳисса қўшишини” айтган, деб ёзди ASIA-Plus.

Шунингдек, Тожикистонда фолбинлик ва сеҳргарлик билан шуғулланганлик учун жазо кучайтирилган. Парламент бундай хизматлар учун жаримани қарийб 800 долларгача оширди ва 10 кундан 15 кунгача маъмурий қамоққа олишни жорий қилди. Агар такроран содир этилса, бу каттароқ жарима ёки бир йилдан икки йилгача озодликдан маҳрум қилиш билан жазоланади.

“Gazeta.uz” нашрининг ёзишича, бир неча кун аввал Тожикистон ҳукумати нафақат фолбин ва сеҳргарларга, балки уларнинг мижозларига ҳам маъмурий жазо қўллашни таклиф қилинган. Жазо эса 81 долларгача бўлиши кутилаётганди. Мамлакатда 2025-йилнинг илк 6 ойида сеҳргарлик ва фолбинлик билан шуғулланишнинг 495 та ҳолати аниқланган.

Жаҳон

25.08.2025, 17:21

Улашиш:

#Тожикистон #жарима #фолбин ва сеҳргарлар

мавзуга оид янгиликлар