Тошкент 343-ўринга кўтарилди: Global Cities Index 2026 натижалари эълон қилинди

Тошкент Global Cities Index 2026 рейтингида 128 поғона юқорилаб, дунёнинг мингта энг йирик шаҳри орасида 343-ўринни эгаллади. Иқтисодий тоифада Ўзбекистон пойтахти янада сезиларли сакрашни амага оширди: бир йил ичида 558-ўриндан 188-ўринга кўтарилди.

Рейтингдаги энг муҳим жиҳат — Тошкент инсон капитали бўйича дунёда 108-ўринни эгаллади. 2024 йилда шаҳар 136-ўринда, 2025 йилда эса 123-ўринда эди. Рейтингнинг кетма-кет учта нашрида одамларнинг билими, кўникмаси ва касбий салоҳиятини акс эттирувчи йўналишда барқарор ўсиш қайд этилди.

Boston Consulting Group компанияси 2025 йилда ўтказган ва 2026 йил 21 майда эълон қилган «Built to Change: How Cities Compete for the Future» тадқиқотида Тошкент дунёнинг 80 та шаҳри орасида ўзгариш тезлиги бўйича фақатгина Шенчжен ва Ар-Риёддан кейин учинчи ўринни эгаллаганди. Шу билан бирга, иқтисодий фаолликдаги ўзгаришлар тезлиги бўйича пойтахт биринчи ўринни эгаллади. BCG нафақат шаҳарнинг ҳозирги ҳолатини, балки унинг қанчалик тез ривожланаётганини, мослашаётганини ва аҳоли учун шароитларни яхшилаётганини баҳолайди. Тадқиқот 200 дан ортиқ кўрсаткичларни қамраб олади ва дунё шаҳарларининг 24 минг нафар аҳолиси ўртасида ўтказилган сўровнома натижаларини ҳисобга олади.

Рақамлар ортида ҳар куни пойтахт келажагини яратаётган инсонлар турибди: ўқитувчилар ва шифокорлар, муҳандислар ва тадбиркорлар, шаҳар хизматлари мутахассислари, талабалар ва ёш мутахассислар. Тошкент уларнинг билими, ташаббуслари ва меҳнати эвазига кучлироқ бўлиб бормоқда. Айнан шунинг учун ҳам инсон шаҳарни ривожлантиришга оид қарорлар марказида қолмоқда, деб ёзди Тошкент шаҳар ҳокимлиги матбуот хизмати.

Таъкидланишича, ушбу натижалар Президент Шавкат Мирзиёев ташаббуси билан амалга оширилаётган ўзгаришлар, Президент Администрациясининг пойтахтни ривожлантиришга қаратаётган эътибори, шаҳар ва туман жамоаларининг ҳамжиҳатликда ишлаши, бизнеснинг саъй-ҳаракатлари ва аҳолининг бевосита иштироки туфайли мумкин бўлди. Халқаро таҳлилчилар Тошкентни «Cities to Watch» — ривожланишини кузатиб бориш лозим бўлган шаҳарлар рўйхатига киритдилар.

Аммо рейтингдаги юқори ўрин фақатгина ўзгаришлар кундалик ҳаётда сезилгандагина маънога эга бўлади. Шаҳар муҳити сифати, тоза ҳаво ва ҳар бир туманнинг қулайлиги учун ҳали кўп ишларни амалга ошириш зарур. Иқтисодий ўсиш одамлар учун — Тошкентда ўқиш, ишлаш, ўз бизнесини қуриш ва фарзандларини улғайтириш каби янги имкониятларга айланиши керак, дейилади хабарда.