Европа давлати эшикларини очмоқда: 500 минг муҳожир қабул қилинади

Шу жумладан, Туркия фуқаролари ҳам қонуний миграция дастури доирасида иштирок этиш имконига эга бўладилар.

Аввалроқ «кўчишни чеклаймиз» деган сиёсатни қўллаб-қувватлаган Рим ҳукумати эндиликда бутунлай тескари йўналишда ҳаракат қилмоқда. 

Мутахассисларнинг таъкидлашича, ҳар учта корхонадан бири келгуси йили Европа Иттифоқи ташқарисидан ходим жалб этишни режалаштирган. Дастур доирасида ишчи топувчи агентликлар ходимларга ҳали ўз мамлакатларидаёқ италян тили ва касб малакаси бўйича тайёргарлик курсларини ташкил этади.

Рим ҳукумати 2026–2028 йилларни қамраб олувчи янги миграция қарорини эълон қилди.

Бош вазир Жоржия Мелони бошчилигидаги ҳукумат илгари 2023–2025 йиллар учун 450 минг кишилик квота белгилаган эди. Энди эса бу рақам 500 минг нафарга етказилди.

Расмий қарорга кўра:

• 2026 йилда – 164 850 киши,
• 2027 йилда – 165 850 киши,
• 2028 йилда – 166 850 киши Италияга қонуний йўл билан кириш имконига эга бўлади.

Дастур доирасида қишлоқ хўжалиги, туризм, оилавий хизмат, қурилиш каби соҳалар устувор йўналиш сифатида белгиланган. Аризалар эса «click day» деб номланган махсус санада қабул қилинади.

Бош вазирлик баёнотида янги режа «мамлакат иқтисодиёти учун зарур бўлган ишчи кучини Италияга жалб этишни» мақсад қилгани таъкидланган.

Қарорда мавсумий ва доимий ишчилар, уй хизматчилари ҳамда парваришчилар учун алоҳида квоталар белгиланади. Шунингдек, Италия билан ҳамкорлик қилаётган ва ноқонуний миграцияни тўхтатишга кўмаклашаётган мамлакатлар учун «имтиёзли квота» тизими жорий этилади.