1001 бош сигир ва «Hyundai» асосчиси: миллионернинг виждон қарзи қандай қайтарилди?

Ўтган аср бошларида у Кореянинг чекка қишлоғида қашшоқ оилада вояга етган. Яхшироқ ҳаёт излаб, бир куни отасининг оиланинг ягона тирикчилик манбаи бўлган сигирини яширинча сотади ва шу пулга Сеулга йўл олади.

У пойтахтга на пул, на таниш-билиш ва на кафолат билан келган эди. Фақат бир орзуси бор эди – ўз тақдирини ўзгартириш.

Йиллар давомидаги оғир меҳнат, омадсизликлар ва тинмас ҳаракатлар натижасида у Hyundai компаниясига асос солди ва дунёдаги энг машҳур тадбиркорлардан бирига айланди.

Бироқ унинг ҳаётидаги энг таъсирли воқеалардан бири 1998 йилда содир бўлди.

Ўша йили Чон Чжу Ён қаттиқ назорат остидаги Шимолий Кореяга ташриф буюриб, туғилган қишлоғига 1001 бош сигир олиб борди.

Бу оддий хайрия эмасди.

Тадбиркор шу тариқа бир вақтлар яхшироқ ҳаёт илинжида сотиб юборган ягона сигир учун рамзий маънода қарзини қайтарди. 1000 бош сигир – оиласи ва ватанига бўлган миннатдорлик ифодаси бўлса, яна битта қўшимча сигир келажакка бўлган умид ва эзгулик рамзи сифатида талқин қилинади.

Бу воқеа нафақат Hyundai тарихида, балки бизнес оламида ҳам инсонпарварлик, миннатдорлик ва ўз илдизларини унутмасликнинг ёрқин намунаси сифатида тилга олинади.

Муаллиф: Азиз Солиев