Жанубий Корея ўз ҳудудида атом сувости кемаларини қуради

Жанубий Корея атом сувости кемаларини ўз мамлакатида қуради. Бу ҳақда мудофаа вазири маълум қилиб, биринчи кема 2030 йиллар ўрталарида сувга тушириш режалаштирилаётганини айтди.

Сеул ядровий қуролга эга Шимолий Кореяга қарши тийиб туриш сиёсатини кучайтиришга интилмоқда. 

Жанубий Корея АҚШдан чекланган миқдордаги ядро ёқилғисини етказиб беришга рухсат олгач, атом сувости кемаларига эга бўлган саноқли давлатлар сафига қўшилади.

“Биз 2030 йиллар ўрталарида биринчи кемани сувга тушириш учун ўз технологияларимиз асосида атом сувости кемаларини ишлаб чиқамиз ва қурамиз”, — деди мудофаа вазири Ан Гю Бак президент Ли Чже Мён иштирок этган мудофаа стратегиясига бағишланган йиғилишда.

Ли ноябрь ойида Сеул узоқ кутилган хавфсизлик ва савдо келишуви доирасида ядровий сувости кемаларини қуриш учун Вашингтоннинг розилигини олганини маълум қилганди.

Бу рухсатномага АҚШнинг уранни бойитиш ва ишлатилган ёқилғини қайта ишлашга розилиги ҳам киради.

Бироқ, сувости кемаларининг қаерда қурилиши ҳақида аниқ бир маълумот шу пайтгача йўқ эди.  Трамп эса улар АҚШда қурилишини айтганди.

Ядро реакторларига эга Жанубий Корея сувости кемалари учун кам бойитилган уранни харид қилиш ва ундан фойдаланиш жараёнида ядровий қуролни тарқатмаслик мажбуриятларига амал қилишини маълум қилди.

“Корея Республикаси ядро қуролининг ҳеч бир турига эга эмас ва уни қатъий ишлаб чиқармаслик позициясида”, — деди Ан.

Лининг таъкидлашича, атом сувости кемалари “Корея яриморолида тинчлик ва хавфсизлик учун масъулиятни зиммасига олишга бўлган қатъият тимсоли”дир.

АҚШ ядровий сувости кемалари технологияси энг махфий ва қаттиқ қўриқланадиган ҳарбий сир саналади.