Жанубий Корея Шимолий Корея бўйича позициясини ўзгартирди

Жанубий Кореянинг Ли Чже Мюн бошчилигидаги амалдаги ҳукумат Шимолий Корея билан муносабатларда “босим ва қарама-қаршилик” сиёсатидан воз кечиб, позициясини “тинч-тотув бирга яшаш”га қаратди.

18 май куни Бирлашиш вазирлиги томонидан эълон қилинган “Оқ китоб”да шу ҳақда сўз боради.

“Yonhap” ахборот агентлигининг қайд этишича, аввалги ҳукумат ёндашувидан тубдан фарқ қилувчи ушбу йиллик ҳужжат ўтган йилнинг июнь ойида ҳокимиятга келган Ли маъмуриятининг таранглашган кореялараро муносабатларни тиклашга қаратилган саъй-ҳаракатларини акс эттиради.

Президент Юн Сок Ёл бошчилигидаги мамлакатнинг аввалги консерватив ҳукумати Шимолий Кореяга босим ўтказиш ва у ерга ташқи ахборот оқимини олиб кириш орқали Пхенянда ўзгаришлар қилишга интилганди.

Ҳужжатда келтирилган Сеулнинг учта асосий етакчи тамойили қуйидагилар:

-       Шимолий Кореядаги давлат тузумини ҳурмат қилиш;

-       уни ўзига қўшиб олиш орқали бирлашишга интилмаслик;

-       ҳар қандай душманлик ҳаракатларидан йироқ бўлиш.

Шунингдек, “Оқ китоб”да Ли ҳукуматининг Шимолий Кореяга давлатга қарши тарғибот варақаларини юборишни тақиқлаш ҳамда чегара ҳудудларида карнайлар орқали эшиттиришлар беришни тўхтатиш ҳақидаги қарорлари мавжуд.

Улар ҳарбий тарангликни юмшатиш ва ўзаро ишончни қайта тиклаш йўлидаги муҳим қадамлар сифатида баҳоланган.

Бундан ташқари, ҳужжатда ўша пайтдаги Президент Мун Чже Ин ва КХДР етакчиси Ким Чен Ин томонидан 2018 йил 19 сентябрда имзоланган кореялараро ҳарбий битимни қайта тиклаш ҳамда тинч-тотув бирга яшашнинг тизимли асосини яратиш мақсадида икки томонлама янги келишувга эришиш режалари баён этилган.

Шунга қарамай, икки ашаддий рақиб ўртасида сўнгги беш йил ичида ҳеч қандай гуманитар ва иқтисодий алмашинувлар амалга оширилмагани сабабли, кореялараро муносабатлар амалда “музлаган” ҳолда қолмоқда.

Боз устига, жорий ой бошида Шимолий Корея ўз Конституциясига ўзгартириш киритиб, бирлашишга оид барча бандларни олиб ташлади ва Жанубий Корея билан амалдаги сўнгги алоқаларни ҳам узди.