"Euronews" сайёҳларга Шаҳрисабзнинг бетакрор муҳитини намойиш этмоқда

Ўзбекистонга бўлган халқаро қизиқиш тобора кучайиб бормоқда ва дунёнинг етакчи оммавий ахборот воситалари мамлакатнинг сайёҳлик салоҳиятига янада кўпроқ эътибор қаратмоқда.

 Жумладан, "Euronews" телеканали "Ипак йўли саргузаштлари" кўрсатувининг навбатдаги қисмида томошабинларни буюклар тақдири туғилган афсонавий Шаҳрисабзга саёҳат қилишга таклиф этди.

Ушбу сонда Шаҳрисабз Буюк Ипак йўлининг энг ёрқин сайёҳлик марказларидан бири сифатида тақдим этилган. Кўрсатув томошабинларни ўз тарихий руҳини ва ўзига хос муҳитини сақлаб қолган шаҳарнинг улуғворлиги билан таништиради. Сюжетда таъкидланишича, Шаҳрисабз нафақат ўтмишнинг буюк шахслари билан боғлиқ, балки бугунги кунда ҳам сайёҳлар минтақанинг маданияти, анъаналари ва меҳмондўстлигини кашф этадиган маскан бўлиб қолмоқда.   

"Ипак йўли саргузаштлари" каби кўрсатувлар туризмни ривожлантиришда муҳим аҳамиятга эга. Улар саёҳатга қизиқиш уйғотади, мамлакат ҳақидаги тасаввурларни кенгайтиради ва сайёҳларни Ўзбекистонни ўз саёҳат йўналишларига киритишга илҳомлантиради.