"Euronews" sayyohlarga Shahrisabzning betakror muhitini namoyish etmoqda

Oʻzbekistonga boʻlgan xalqaro qiziqish tobora kuchayib bormoqda va dunyoning yetakchi ommaviy axborot vositalari mamlakatning sayyohlik salohiyatiga yanada koʻproq eʼtibor qaratmoqda.

 Jumladan, "Euronews" telekanali "Ipak yoʻli sarguzashtlari" koʻrsatuvining navbatdagi qismida tomoshabinlarni buyuklar taqdiri tugʻilgan afsonaviy Shahrisabzga sayohat qilishga taklif etdi.

Ushbu sonda Shahrisabz Buyuk Ipak yoʻlining eng yorqin sayyohlik markazlaridan biri sifatida taqdim etilgan. Koʻrsatuv tomoshabinlarni oʻz tarixiy ruhini va oʻziga xos muhitini saqlab qolgan shaharning ulugʻvorligi bilan tanishtiradi. Syujetda taʼkidlanishicha, Shahrisabz nafaqat oʻtmishning buyuk shaxslari bilan bogʻliq, balki bugungi kunda ham sayyohlar mintaqaning madaniyati, anʼanalari va mehmondoʻstligini kashf etadigan maskan boʻlib qolmoqda.   

"Ipak yoʻli sarguzashtlari" kabi koʻrsatuvlar turizmni rivojlantirishda muhim ahamiyatga ega. Ular sayohatga qiziqish uygʻotadi, mamlakat haqidagi tasavvurlarni kengaytiradi va sayyohlarni Oʻzbekistonni oʻz sayohat yoʻnalishlariga kiritishga ilhomlantiradi.