Бухорода “Leapmotor” автомобиллари ишлаб чиқарилади

Жорий йил 1 апрель куни Бухоро вилоятида Президент раислигида ўтказилган йиғилишда Хитой Халқ Республикасининг “Zhejiang Leapmotor Technology Co., Ltd.” компанияси иштирокида вилоятда автомобиль ишлаб чиқариш қувватларини босқичма-босқич йўлга қўйиш лойиҳаси тақдимот қилинган.

Лойиҳанинг ишлаб чиқариш ва даромадлар режаси қуйидагича белгиланган:

-      2026 йилда — 20 минг дона автомобиль (50 млн доллар);

-      2027 йилда — 40 минг дона автомобиль (100 млн доллар);

-      2028 йилда — 60 минг дона автомобиль (150 млн доллар);

-      2029 йилда — 100 минг дона автомобиль (200 млн доллар);

-      2030 йилда — 150 минг дона автомобиль (300 млн доллар);

-      2031 йилда — 200 минг дона автомобиль (350 млн доллар).

Мазкур лойиҳа доирасида B10, B10L, A10, C01, C16 автомобиль моделларини ишлаб чиқариш кўзда тутилган.

Шунингдек, автомобиль бутловчи қисмларини босқичма-босқич маҳаллийлаштириш режалаштирилган. Жумладан, бамперлар, ўриндиқлар, ойналар, эшик қопламалари, шиналар, орқа кўриниш кўзгулари, симлар жамланмаси, аккумуляторлар, асбоблар панели, торпеда қисми, ёритиш ускуналари ва бошқа айрим автокомпонентларни маҳаллий ишлаб чиқариш мақсад қилинмоқда.

Лойиҳага мувофиқ, Бухоро вилоятини Марказий Осиёдаги автомобилсозлик ва логистика хаби сифатида шакллантириш мақсад қилинган. Натижада келгусида нафақат ички бозорни таъминлаш, балки қўшни мамлакатлар бозорига чиқиш имкониятлари ҳам кенгайиши мумкин. 

Лойиҳа доирасида 2026 йилда 200 та, 2028 йилда 1000 та, 2031 йилда 3000 та янги иш ўринлари яратиш режалаштирилган.

Бундан ташқари, малакали муҳандис ва техник кадрлар тайёрлаш мақсадида Бухоро давлат техника университети, Тошкент шаҳридаги INHA университети, Ахборот технологиялари университети, Турин политехника университети билан ҳамкорлик қилинади.

“Leapmotor” Хитойнинг тез ўсаётган электромобиль ишлаб чиқарувчи компанияларидан бири бўлиб, 2015 йилда ташкил топган.

Компания 2025 йилда 600 мингда машина сотган, 2026 йилда эса бу рақамни 1 миллионтага етказишни мақсад қилган.