updated: 22.03.2026, 07:27

Фарғонада ўзбекистонлик бир гуруҳ террорчилар қўлга тушди

Фарғона вилоятида халқаро террористик ташкилотга алоқадор 11 нафар шахс қўлга олинди. Бу ҳақда Давлат хавфсизлик хизмати маълум қилди.

Ўзбекистон

07.11.2024, 11:41

Lotinchada

Улашиш:

Fargʻonada oʻzbekistonlik bir guruh terrorchilar qoʻlga tushdi

Қайд этилишича, ДХХ ходимлари томонидан Қўқон шаҳрида тезкор-қидирув тадбири ўтказилган. Тадбир давомида мазкур ҳудудда фаолият олиб борган "Тавҳид ва жиҳод катибаси" халқаро террористик ташкилотининг тарафдорларидан иборат жамоат борлиги аниқланган.

Ушбу жамоада бўлган 11 нафар шахс Фарғона вилоятининг Ўзбекистон тумани ҳамда Қўқон шаҳрида яшаган. Улар 1980-2000 йиллар оралиғида туғилган Ўзбекистон фуқароси бўлган. Мазкур шахслар ҳудудда фармацевтика соҳасида фаолият юритувчи масъулияти чекланган жамиятда менежер, газ қуйиш шохобчасида бош механик бўлиб ишлаган. Шунингдек, уларнинг орасида хусусий тадбиркорлик, ошпазлик, устачилик, киракашлик билан шуғулланган фуқаролар ҳам бўлган.

Ноқонуний гуруҳ аъзолари 2021-2023 йиллар давомида Қўқон шаҳрида жойлашган чойхоналарда "шанбалик ошлар" номи остида йиғинлар ташкил этиб, унда Абдуллоҳ Зуфар, Содиқ Самарқандий, Яхё Туркистоний ва бошқаларнинг жиҳод, шаҳидликка ҳамда ислом давлати қуришга чорловчи, диний экстремизм ва ақидапарастлик ғоялари билан йўғрилган маърузаларини эшитиб келган.

Бундан ташқари, улар амалда бўлган давлат тузумини Конституцияга хилоф тарзда ўзгартиришга xалифалик давлати қуришга қаратилган ғояларни гаплашган ҳамда жамоат аъзоларининг айримларини Сурияга ҳижрат қилиш масаласини муҳокама қилган.

Юқоридаги ташкилотнинг 2 нафар аъзоси ўзаро тил бириктириб, ҳозирда Суриядаги "Тавҳид ва жиҳод катибаси" халқаро террористик ташкилоти фаолиятида иштирок этиб келаётган қўқонлик Жасур исмли шахсга моддий ёрдам бериш мақсадида 2023 йилнинг июль ва август ойларида жами 3000 АҚШ доллари миқдорида пул маблағи юборган.

Аниқланишича, ташкилот аъзолари жамоат аъзоларига ўз сафларини кенгайтириш учун йиғинларга бошқа фуқароларни ҳам жалб қилиб, уларнинг онгига экстремистик ғояларни сингдирган. Telegram мессенжерида эса ўзлари ташкил этган гуруҳда маълумотлар алмашиб, навбатдаги йиғин вақти ва жойини эълон қилиб турган. Улар ҳар 15 кунда 1 ой ичида қандай ишларни амалга оширганликлари бўйича гуруҳ етакчисига ҳисобот берган.

Сўнг қўлга тушган 11 нафар шахсга нисбатан Жиноят ишлари бўйича Қўқон шаҳар судининг ҳукми ўқилган. Унда ноқонуний гуруҳ аъзолари Жиноят кодексининг 155-3, 159, 244-1 ва 244-2-моддалари билан айбли деб топилиб, 6 йилдан 12 йилгача озодликдан маҳрум қилиш жазоси тайинланган.

Ўзбекистон

07.11.2024, 11:41

Улашиш:

#ДХХ

мавзуга оид янгиликлар