Fargʻonada oʻzbekistonlik bir guruh terrorchilar qoʻlga tushdi

Qayd etilishicha, DXX xodimlari tomonidan Qoʻqon shahrida tezkor-qidiruv tadbiri oʻtkazilgan. Tadbir davomida mazkur hududda faoliyat olib borgan "Tavhid va jihod katibasi" xalqaro terroristik tashkilotining tarafdorlaridan iborat jamoat borligi aniqlangan. 

Ushbu jamoada boʻlgan 11 nafar shaxs Fargʻona viloyatining Oʻzbekiston tumani hamda Qoʻqon shahrida yashagan. Ular 1980-2000 yillar oraligʻida tugʻilgan Oʻzbekiston fuqarosi boʻlgan. Mazkur shaxslar hududda farmatsevtika sohasida faoliyat yurituvchi masʼuliyati cheklangan jamiyatda menejer, gaz quyish shoxobchasida bosh mexanik boʻlib ishlagan. Shuningdek, ularning orasida xususiy tadbirkorlik, oshpazlik, ustachilik, kirakashlik bilan shugʻullangan fuqarolar ham boʻlgan. 

Noqonuniy guruh aʼzolari 2021-2023 yillar davomida Qoʻqon shahrida joylashgan choyxonalarda "shanbalik oshlar" nomi ostida yigʻinlar tashkil etib, unda Abdulloh Zufar, Sodiq Samarqandiy, Yaxyo Turkistoniy va boshqalarning jihod, shahidlikka hamda islom davlati qurishga chorlovchi, diniy ekstremizm va aqidaparastlik gʻoyalari bilan yoʻgʻrilgan maʼruzalarini eshitib kelgan. 

Bundan tashqari, ular amalda boʻlgan davlat tuzumini Konstitutsiyaga xilof tarzda oʻzgartirishga xalifalik davlati qurishga qaratilgan gʻoyalarni gaplashgan hamda jamoat aʼzolarining ayrimlarini Suriyaga hijrat qilish masalasini muhokama qilgan. 

Yuqoridagi tashkilotning 2 nafar aʼzosi oʻzaro til biriktirib, hozirda Suriyadagi "Tavhid va jihod katibasi" xalqaro terroristik tashkiloti faoliyatida ishtirok etib kelayotgan qoʻqonlik Jasur ismli shaxsga moddiy yordam berish maqsadida 2023 yilning iyul va avgust oylarida jami 3000 AQSh dollari miqdorida pul mablagʻi yuborgan. 

Aniqlanishicha, tashkilot aʼzolari jamoat aʼzolariga oʻz saflarini kengaytirish uchun yigʻinlarga boshqa fuqarolarni ham jalb qilib, ularning ongiga ekstremistik gʻoyalarni singdirgan. Telegram messenjerida esa oʻzlari tashkil etgan guruhda maʼlumotlar almashib, navbatdagi yigʻin vaqti va joyini eʼlon qilib turgan. Ular har 15 kunda 1 oy ichida qanday ishlarni amalga oshirganliklari boʻyicha guruh yetakchisiga hisobot bergan. 

Soʻng qoʻlga tushgan 11 nafar shaxsga nisbatan Jinoyat ishlari boʻyicha Qoʻqon shahar sudining hukmi oʻqilgan. Unda noqonuniy guruh aʼzolari Jinoyat kodeksining 155-3, 159, 244-1 va 244-2-moddalari bilan aybli deb topilib, 6 yildan 12 yilgacha ozodlikdan mahrum qilish jazosi tayinlangan.