Тошкентда Халқаро миграция форуми бошланди: 40 дан ортиқ давлатдан 600 вакил иштирок этмоқда

Бугун Ўзбекистон пойтахтида “Ижтимоий-ҳуқуқий муҳофаза қилиш ва меҳнат мигрантлари ҳамда уларнинг оила аъзолари” мавзусига бағишланган биринчи Тошкент халқаро миграция форуми ўз ишини бошлади.

Ушбу форум Ўзбекистон Вазирлар Маҳкамаси ҳузуридаги Миграция агентлиги ҳамда Халқаро миграция ташкилоти билан ҳамкорликда ташкил этилди.

Тадбирда Марказий Осиё, Осиё, Европа ва АҚШнинг 40 дан ортиқ мамлакатидан 600 нафардан зиёд вакиллар иштирок этмоқда.

Тадбир доирасида қуйидаги масалалар муҳокама қилиниши режалаштирилган:

-      легал миграция йўлларини кенгайтириш;

-      меҳнат мигрантларининг ҳуқуқлари ва фаровонлигини таъминлаш;

-      миграция соҳасида халқаро ҳамкорликни мустаҳкамлаш.

Айниқса, иқлим ўзгаришининг аҳоли мобиллигига таъсири ҳамда барқарор ривожланиш масалаларига алоҳида эътибор қаратилмоқда.

Халқаро миграция ташкилоти маълумотларига кўра, дунёда тахминан 304 миллион халқаро мигрант мавжуд бўлиб, улардан 168 миллиони меҳнат мигрантларидир.

Мигрантларнинг ўз оилаларига юборадиган йиллик пул ўтказмалари ҳажми тахминан 905 миллиард АҚШ долларини ташкил этади.

Форум якунлари бўйича халқаро иш берувчилар ва Ўзбекистон Миграция агентлиги ўртасида янги келишувлар имзоланиши кутилмоқда.

Шунингдек, форум доирасида халқаро тил ва касбий тайёргарлик маркази “ИНТИЛ”нинг очилиш маросими бўлиб ўтади.

Ушбу марказ Ўзбекистон фуқароларини замонавий касблар ва хорижий тилларга ўқитиш, уларни кейинчалик хорижда ишга жойлаштиришга ихтисослашган.