Янги Наманганда янги IT-парк қурилиши бошланди

Шавкат Мирзиёев Давлатобод туманидаги Янги Наманган шаҳарчаси ҳудудида IT-парк қурилишига тамал тоши қўйиш маросимида иштирок этди.

Наманган вилояти аҳолисининг 1 миллион 600 мингдан ортиғини ёшлар ташкил этиши, бу жуда катта ижтимоий-иқтисодий капитал эканини таъкидланди.

Экспертлар Ўзбекистоннинг сунъий интеллект бўйича салоҳиятини 10 миллиард долларга баҳоламоқда.

Сўнгги йилларда Нукус, Қарши, Термиз, Урганч ва Фарғона шаҳарларида замонавий IT-парклар ишга туширилди. Ўтган йили октабрда пойтахтда IT-парк лойиҳасининг иккинчи босқичи бошланган эди.

Хитойлик ҳамкорлар билан 117 миллион долларлик йирик лойиҳа асосида республиканинг 6 та ҳудудида IT-парклар қурилади:

• Янги Наманган;
• Самарқанд;
• Чирчиқ;
• Нурафшон;
• Урганч;
• Навоий шаҳарларида.

Янги Наманган шаҳрида барпо этиладиган мажмуа ушбу лойиҳанинг илк қалдирғочи бўлади.

Лойиҳага мувофиқ, 1,7 гектар майдонда 17 қаватли замонавий бино барпо этилади. Бино хорижий ҳамкорлар томонидан лойиҳалаш ва қурилишдан тортиб, ички жиҳозлашгача бўлган барча босқичларни қамраб олган ҳолда тўлиқ тайёр ҳолда фойдаланишга топширилади.

Майдони қарийб 18 минг квадрат метр бўлган ушбу замонавий мажмуада таълим ва экспорт марказлари, коворкинг ва офис майдонлари, стартап акселератори ҳамда хорижий компаниялар учун махсус хизмат кўрсатиш тизими ташкил этилади.

Бу ерда ўнлаб компаниялар ва стартап студиялар ягона ахборот технологиялари экотизими сифатида фаолият юритади.

Мажмуада наманганлик 2 мингга яқин ёшлар учун иш ўринлари яратилиш режалаштирилган.

Лойиҳанинг ишга тушиши вилоятда АТ хизматлар йиллик ҳажмини 500 миллиард сўмга, экспортни эса 30 миллион долларга етказишга хизмат қилади. 

Шавкат Мирзиёев лойиҳани амалга оширишда иштирок этаётган хорижий ҳамкорларга миннатдорлик билдирди. Шундан сўнг Президент Янги Наманган IT-парки қурилишига тамал тоши қўйди.