Ўзбекистонда ярим йилда 172 мингдан ортиқ автомобил сотилди

"Ўзавтосаноат" компаниясининг маълум қилишича, 2025 йилнинг биринчи ярмида UzAuto Motors 94 минг 48 та автомобил сотди, бу умумий бозор улушининг 54,6 фоизини ташкил этади. Иккинчи ўринда — Khorezm Auto (UzAuto Motors таркибида), у 47 921 та авто восита сотган ва бозорнинг 27,8 фоизини эгаллаган. ADM Jizzakh компанияси эса 19 672 та автомобил сотиғи билан учинчи ўринда турибди — бу 11,4 фоиз улушга тенг.

Бозордаги бошқа иштирокчилар орасида BYD Uzbekistan Factory 9 708 та авто сотган (5,6 фоиз). Шунингдек, Asaka Motors — 623 та, SamAuto — 238 та, Alyans Auto — 48 та автомобил сотган.

Брендлар кесимида Chevrolet етакчилигини сақлаб турибди: 141 969 та автомобил сотилган. Кейинги ўринларда KIA — 11 361 та, BYD — 9 708 та, Chery — 4 614 та, Haval — 3 697 та, Hyundai — 444 та, Isuzu D-Max — 238 та ва Wuling — 105 та автомобил билан қайд этилган.

Моделлар бўйича Chevrolet Cobalt энг кўп сотилган авто бўлиб, 67 580 та мижозга етказиб берилган. Иккинчи ўринда — Chevrolet Damas (31 641 та), учинчида эса — Chevrolet Tracker (16 641 та).

Шунингдек, энг талабгир ўнталикка Chevrolet Labo (16 276 та), Onix (8 704), KIA Sonet (7 873), BYD Song Plus Champion DMI (2 539), BYD Chazor (2 082), Haval M6 (2 001) ва BYD Yuan Up (1 937) кирган.