Бу ҳақда компания матбуот хизмати маълум қилди.

Ижтимоий тармоқларда тарқалган видеоларда номаълум шахслар уй эгаларидан хонадонда нечта киши яшаши ҳақида сўраб, ўзларини «лабораториядан келганмиз» дея таъкидлаган. Айрим ҳолатларда улар хонадонга киришга уриниб, ҳатто аҳоли билан тортишув ҳам келиб чиққан.

«Тошкент шаҳар сув таъминоти» МЧЖ маълум қилишича, видеолар текширилган ва уларда акс этган шахслар компания ходимлари эмаслиги аниқланган. Уларнинг ташрифи сабаби ҳам ҳозирча маълум эмас.

Шу каби ҳолатлар пойтахтнинг бир нечта туманларида — хусусан, Олмазор ва Яккасарой туманларида ҳам қайд этилган.

Компания таъкидлашича, сув таъминоти лабораторияси ходимлари асоссиз равишда уйларни айланмайди. Улар фақат истеъмолчилар мурожаатига асосан ва ҳудудий инспекторлар ҳамроҳлигида чиқишади. Ҳар бир мутахассис хизмат гувоҳномасига эга бўлиши ҳамда уй эгасининг розилигидан кейингина сув намунасини олиши мумкин.

Ташкилот бу каби ҳолатлар такрорланмаслиги учун маълумотларни ҳуқуқни муҳофаза қилувчи органларга топширишини билдирди.