Британия Европа Миграция Тармоғига кузатувчи давлат сифатида қўшилди

2026 йил 19 июнь куни Брюсселда Европа Комиссияси билан Британия Ички ишлар вазирлиги ўртасида Маъмурий Келишув имзоланди.

Ушбу ҳужжат орқали Британия Европа Миграция Тармоғида (EMN)  кузатувчи давлатга айланди.

Миграция ва ички ишлар бўйича Бош директор Беате Гминдер келишувни имзолаш учун Британиянинг Миграция ва чегаралар гуруҳи Бош директори Дан Ҳоббс билан учрашди.

Томонлар Британия, Европа миграция тармоғига аъзо мамлакатлар (Даниядан ташқари Европа Иттифоқи аъзолари) ҳамда кузатувчи давлатларда (Норвегия, Грузия, Молдова Республикаси, Украина, Черногория, Арманистон, Сербия, Шимолий Македония Республикаси, Албания) бошпана бериш ва миграция масалалари борасида замонавий, холис, ишончли ва қиёсий маълумотлар алмашишга келишиб олди.

Мазкур маъмурий келишув ҳамкорликни мустаҳкамлаш ва ахборот алмашинувини самарали йўлга қўйиш йўлидаги муҳим қадамдир. EMN — сиёсий қарорлар ишлаб чиқишга ёрдам бериш мақсадида миграция, бошпана бериш ва ички ишлар бўйича маълумот берувчи умумевропа тармоғидир.

Британия кузатувчи давлат сифатида EMN нашрлари, конференциялари ва бошқа тадбирларига ҳиссасини қўшиш орқали тармоқ фаолиятини ривожлантиришга кўмаклашади.