Ўзбекистонда 2 мингдан зиёд рақобатга зид ҳужжатлар имзоланилгани маълум бўлди

Хабарга кўра, сўнгги уч йилда 2 мингдан ошиқ рақобатга зид ҳужжатлар аниқланган. Уларнинг аксарияти маҳаллий ҳокимликлар ва вазирликлар томонидан қабул қилинган.

“Ўтган йили “Рақобат тўғрисида”ги қонуннинг янги таҳрири қабул қилинган. Шу аснода олиб борилган ўрганишларга кўра, айрим ташкилотларда рақобатга зид қарорлар қабул қилиш, тўғридан-тўғри шартномалар тузиш, савдода устун мавқедан фойдаланиш каби ҳолатлар кузатилган”, 

дейилади унда. 

Шу билан бирга, беш йил ичида 25 дан ортиқ маҳсулот бўйича рақобат муҳити яхшиланган. 7 та фаолият тури бўйича рақобатни чекловчи махсус ҳуқуқлар бекор қилинган. Давлат иштирокидаги корхоналар 42 фоизга камайиб, тадбиркорлик субъектлари сони 1,6 баробар кўпайган.

Айтилишича, бу рақамларни ижобий томонга ўстириш мақсадида янги концепция ишлаб чиқилган. Унда энергетика, нефть-газ, сув хўжалиги, йўл қурилиши, темир йўл ва аэропорт хизматлари каби қатор соҳаларда 17 турдаги давлат монополиясини босқичма-босқич тугатиш чоралари белгиланган.

Бундан ташқари, қўмита фаолиятини жамоатчиликка очиқлаш ва оммавий ахборот воситаларида ёритишни кучайтириш кераклиги ҳам айтилди. Бу қонун бузилишининг олдини олиш, шаффофлик ва ҳалоллик муҳитини шакллантириш нуқтаи назардан муҳим экани таъкидланди.