Oʻzbekistonda 2 mingdan ziyod raqobatga zid hujjatlar imzolanilgani maʼlum boʻldi

Xabarga koʻra, soʻnggi uch yilda 2 mingdan oshiq raqobatga zid hujjatlar aniqlangan. Ularning aksariyati mahalliy hokimliklar va vazirliklar tomonidan qabul qilingan.

“Oʻtgan yili “Raqobat toʻgʻrisida”gi qonunning yangi tahriri qabul qilingan. Shu asnoda olib borilgan oʻrganishlarga koʻra, ayrim tashkilotlarda raqobatga zid qarorlar qabul qilish, toʻgʻridan-toʻgʻri shartnomalar tuzish, savdoda ustun mavqedan foydalanish kabi holatlar kuzatilgan”, 

deyiladi unda. 

Shu bilan birga, besh yil ichida 25 dan ortiq mahsulot boʻyicha raqobat muhiti yaxshilangan. 7 ta faoliyat turi boʻyicha raqobatni cheklovchi maxsus huquqlar bekor qilingan. Davlat ishtirokidagi korxonalar 42 foizga kamayib, tadbirkorlik subʼektlari soni 1,6 barobar koʻpaygan.

Aytilishicha, bu raqamlarni ijobiy tomonga oʻstirish maqsadida yangi konsepsiya ishlab chiqilgan. Unda energetika, neft-gaz, suv xoʻjaligi, yoʻl qurilishi, temir yoʻl va aeroport xizmatlari kabi qator sohalarda 17 turdagi davlat monopoliyasini bosqichma-bosqich tugatish choralari belgilangan.

Bundan tashqari, qoʻmita faoliyatini jamoatchilikka ochiqlash va ommaviy axborot vositalarida yoritishni kuchaytirish kerakligi ham aytildi. Bu qonun buzilishining oldini olish, shaffoflik va halollik muhitini shakllantirish nuqtai nazardan muhim ekani taʼkidlandi.