Россия ТИВ Ўзбекистондан блогер Макаренко фаолиятига ҳуқуқий баҳо беришни сўради

Захарова 20 август куни журналистлар билан мулоқотда Макаренкони «русофобик фейклар» тарқатиш ва миллатлараро адоват қўзғатишда айблади. Унинг таъкидлашича, Россия томони Ўзбекистон расмийларидан блогер фаолиятига объектив ҳуқуқий баҳо беришни кутмоқда. 

Россия дипломати Макаренкони Ўзбекистонда судланган блогер Азиз Хакимовга нисбатан жиноят иши қўзғатилишига сабаб бўлган асосий шахс сифатида ҳам тилга олди.

Азиз Хакимов иши ҳақида 

Азиз Хакимовга нисбатан жиноят иши 2025 йил августида қўзғатилган. Никита Макаренко ушбу иш бўйича жабрланувчилардан бири сифатида эътироф этилган. Хакимовга туҳмат, ҳақорат, урушни тарғиб қилиш ҳамда миллий, ирқий, этник ёки диний адоват қўзғатиш билан боғлиқ айбловлар қўйилган эди. 

11 август куни Шайхонтоҳур тумани жиноят ишлари бўйича суди Хакимовни 4 йил 2 ойга озодликдан маҳрум қилиш ҳақида ҳукм чиқарди.

Суд уни Жиноят кодексининг уруш тарғиботига оид 150-моддаси бўйича оқлаган. Бироқ туҳмат, ҳақорат ва миллий адоват қўзғатиш билан боғлиқ моддалар бўйича айбдор деб топган.

Суд, шунингдек, Хакимов юритган Comrade_Aziz Telegram-каналини блоклаш ҳақида қарор қабул қилган. 

Макаренко нима деган эди?

2025 йил август ойида Макаренко Хакимовни Ўзбекистон мустақиллиги қадрини пасайтириш, СССРни улуғлаш ва Украинадаги урушни тарғиб қилишда айблаган.

Шунингдек, у ҳуқуқни муҳофаза қилувчи органларни Хакимовнинг фаолияти юзасидан чора кўришга чақирган. 

Макаренко кейинчалик Хакимов иши бўйича судда жабрланувчи сифатида қатнашган. Суд жараёни ёпиқ тарзда ўтказилгани сабабли ишдаги далиллар ва томонларнинг барча позициялари очиқланмаган. 

Москва ва Тошкент ўртасидаги баҳс

Россия ТИВ Хакимов ишига аввал ҳам муносабат билдирган. Июль ойида Мария Захарова Россия Москва Ўзбекистоннинг ички ишларига аралашишни истамаслигини айтган ҳолда, Хакимовга нисбатан суд жараёни адолатли ва инсонпарвар қарор билан якунланишига умид билдирган эди. 

Энди эса Захарова Москва эътиборини Макаренко фаолиятига қаратмоқда ва Ўзбекистон расмийларидан унга ҳуқуқий баҳо беришни кутмоқда.

Шу билан бирга, Захарованинг Макаренко ҳақидаги айбловлари Россия ТИВнинг расмий позицияси ҳисобланади.