Яна бир россиялик мафкурачи Марказий Осиё суверенитети борасида кескин фикр билдирди

Дугин суверенитет ва миллий давлатлар концепциясини ўтмишга тегишли деб атаб, бу каби тузилмаларни вақтинчалик ҳодиса сифатида кўради. Унинг фикрича, келажак «империялар»га тегишли бўлиб, Россия қўшни давлатлар устидан алоҳида таъсир доирасига эга бўлиши керак.

«Суверенитет тугади. Миллий давлатлар — бу ўтмиш», — дея таъкидлаган Александр Дугин.

Бу баёнот Россия давлат ОАВларида фаол чиқиш қилаётган телебошловчи Владимир Соловьёвнинг Марказий Осиёда «махсус ҳарбий операция» ўтказиш ҳақидаги чақириқларидан кўп ўтмай янгради.

Кузатувчилар бу каби кетма-кет чиқишлар тасодифий эмас, деган фикрни илгари сурмоқда. Шу билан бирга, Россия ТИВ расмий вакили Мария Захарова ушбу баёнотларни яна «шахсий фикр» сифатида изоҳлаб қоладими, деган савол пайдо бўлди.

Шу фон ортида қатор муҳим саволлар кун тартибига чиқмоқда:
Ўзбекистон бу каби очиқ мафкуравий даъволарга қачон ва қандай муносабат билдиради?

Ушбу баёнотларга жавобан камида дипломатик нота юбориш режалаштирилганми?

Айрим экспертлар фикрича, бундай чиқишлар муаллифларини «persona non grata» деб эълон қилиш масаласи ҳам тобора долзарб тус олмоқда. Савол эса очиқ: бунинг учун яна нечта шунга ўхшаш баёнот янграши керак?