Yana bir rossiyalik mafkurachi Markaziy Osiyo suvereniteti borasida keskin fikr bildirdi

Dugin suverenitet va milliy davlatlar konsepsiyasini oʻtmishga tegishli deb atab, bu kabi tuzilmalarni vaqtinchalik hodisa sifatida koʻradi. Uning fikricha, kelajak «imperiyalar»ga tegishli boʻlib, Rossiya qoʻshni davlatlar ustidan alohida taʼsir doirasiga ega boʻlishi kerak.

«Suverenitet tugadi. Milliy davlatlar — bu oʻtmish», — deya taʼkidlagan Aleksandr Dugin.

Bu bayonot Rossiya davlat OAVlarida faol chiqish qilayotgan teleboshlovchi Vladimir Solovyovning Markaziy Osiyoda «maxsus harbiy operatsiya» oʻtkazish haqidagi chaqiriqlaridan koʻp oʻtmay yangradi.

Kuzatuvchilar bu kabi ketma-ket chiqishlar tasodifiy emas, degan fikrni ilgari surmoqda. Shu bilan birga, Rossiya TIV rasmiy vakili Mariya Zaxarova ushbu bayonotlarni yana «shaxsiy fikr» sifatida izohlab qoladimi, degan savol paydo boʻldi.

Shu fon ortida qator muhim savollar kun tartibiga chiqmoqda:
Oʻzbekiston bu kabi ochiq mafkuraviy daʼvolarga qachon va qanday munosabat bildiradi?

Ushbu bayonotlarga javoban kamida diplomatik nota yuborish rejalashtirilganmi?

Ayrim ekspertlar fikricha, bunday chiqishlar mualliflarini «persona non grata» deb eʼlon qilish masalasi ham tobora dolzarb tus olmoqda. Savol esa ochiq: buning uchun yana nechta shunga oʻxshash bayonot yangrashi kerak?