Абдусатторов ва Синдаров бир йилда 700 минг доллардан ортиқ мукофот пули ишлаб топди

2025 йил якунларига кўра, Ўзбекистон шахматчилари халқаро мусобақаларда юқори натижалар қайд этиб, йирик миқдордаги мукофот пулларини қўлга киритди. Хусусан, гроссмейстерлар Нодирбек Абдусатторов ва Жавоҳир Синдаров йил давомида энг кўп даромад топган шахматчилар рейтингида дунёнинг ТОП-10 талигига кирди.

Chess.com портали эълон қилган рейтингга кўра, Абдусатторов ва Синдаров 2025 йилда халқаро турнирлардан энг кўп мукофот пули ишлаб топган шахматчилар орасида мос равишда 9- ва 10-ўринларни эгаллади.

Маълум қилинишича, Нодирбек Абдусатторов йил давомида 16 та нуфузли халқаро турнирда иштирок этиб, жами 361 811 АҚШ доллари миқдорида мукофот пули ишлаб топган. Унинг бир турнирдаги энг йирик индивидуал ютуғи 85 000 долларни ташкил этган.

Жавоҳир Синдаров эса 2025 йилда 11 та халқаро мусобақада қатнашиб, 349 955 АҚШ доллари миқдорида даромад қайд этди. Унинг энг катта ютуғи FIDE World Cup мусобақасидаги муваффақиятли иштироки бўлиб, ушбу турнирда 120 000 доллар мукофот пулига сазовор бўлган.

Ҳисоб-китобларга кўра, икки нафар ўзбекистонлик гроссмейстернинг 2025 йилда халқаро турнирлардан олган умумий мукофот пуллари 711 766 АҚШ долларини ташкил этган.

Қайд этилишича, мазкур сумма фақат халқаро мусобақаларда қўлга киритилган расмий мукофот пулларини ўз ичига олади. Унга ҳомийлик шартномалари, реклама ва тижорий ҳамкорлик даромадлари, давлат мукофотлари, бир марталик бонуслар, стипендиялар, грантлар ҳамда клуб ёки терма жамоа маошлари киритилмаган.