Нодирбек Абдусатторов Нидерландиядаги нуфузли шахмат турнирида ғалаба қозонди

Ўзбекистонлик гроссмейстер Нодирбек Абдусатторов Masters гуруҳи доирасидаги 13-тур учрашувида ҳиндистонлик Аржун Эригаиси устидан ғалаба қозонди. Ушбу натижадан сўнг Абдусатторов очколари сонини 9 тага етказиб, турнир жадвалида якка пешқадам сифатида биринчи ўринни эгаллади ва чемпионликни қўлга киритди.

Нодирбек турнирнинг илк турида туркиялик Яғиз Каан Эрдогмуш билан дуранг ўйнаган бўлса, 2-турда ҳиндистонлик Рамешбабу Праггнанандҳа устидан зафар қучди. 3-турда яна бир ҳиндистонлик шахматчи Аравиндҳ Читамбарам билан дуранг қайд этди. 4-турда эса оқ доналарда Чехия вакили Нгуен Тай Дай Ванни мағлуб этди.

5-турда Абдусатторов қора доналарда АҚШ вакили Ханс Ниманн билан дуранг ўйнади. 6-турда амалдаги жаҳон чемпиони Гукеш Доммаражу, 7-турда эса германиялик Винсент Кеймер устидан ғалаба қозонди. 8-турда нидерландиялик Аниш Гирига қарши баҳсда имкониятни бой берди.

Абдусатторов 9-турда Жавоҳир Синдоров, 10-турда словениялик Владимир Федосеев, 11-турда эса нидерландиялик Йорден ван Форест билан дуранг ўйнади. 31 январь куни бўлиб ўтган 12-тур баҳсида эса германиялик Маттиас Блюбаум устидан ғалаба қозонди.

Шу тариқа, ўзбекистонлик шахматчи 13 учрашувда 9 очко тўплаб, 2026 йилги Tata Steel Chess мусобақасининг бош совринига сазовор бўлди.

Маълумот учун, Нодирбек Абдусатторов аввалги йилларда ҳам Tata Steel Chess турнирида совринли ўринларни эгаллаб келган. У 2023 йилда иккинчи ўринни, 2024 ва 2025 йилларда эса учинчи ўринни қўлга киритган. 2026 йилда эса чемпионликка эришди.