Шаҳрам Ғиёсовнинг промоутерлари чемпионлик жанги учун охиригача курашишга тайёр

Эдди Хирн бошчилигидаги промоутерлик компанияси жангни ким ошди савдоси орқали ташкил этишга тўғри келса ҳам, ушбу чемпионлик тўқнашувини амалга оширишга қатъий бел боғлаган.

WBA ташкилоти яқинда Ромерога Ғиёсовга қарши чемпионлик камарини мажбурий ҳимоя қилишни буюрган. Бу қарордан кейин томонлар жангни ташкил этиш бўйича фаол музокараларга киришган.

“Биз Ромеро билан ишлайдиган Луис Де Кубаз билан мулоқотдамиз. Умид қиламизки, жанг келаси йил бошида бўлиб ўтади”, — деди Matchroom директори Френк Смит Boxing Newsнашрига берган интервьюсида.

“Агар савдолар бўлиб ўтса ҳам, биз келишувга эришишга ҳаракат қиламиз. Шаҳрам бу имкониятга лойиқ — у жаҳон чемпиони унвони учун жанг қилишга катта меҳнат қилди. Менимча, у Ромерони енгади”, — дея қўшимча қилди у.

Эслатиб ўтамиз, Шаҳрам Ғиёсов шу йил апрел ойида АҚШдаги бокс кечасида аргентиналик Франко Максимилиано Окампони мағлуб этган эди. У ўша вақтда қизини йўқотганига қарамасдан, қаттиқ ирода кўрсатиб, ғалаба қозонганди.

“Мен қизимга жаҳон чемпиони бўлишга ваъда берганман. У мени кўриб турибди ва дуо қиляпти. Мен бу ваъдамни бажараман”, — деганди Ғиёсов жангдан кейинги сўзларида.