“Миллий китобхонлик ҳаракати” – бош соврин 50 минг доллар

Президент Шавкат Мирзиёев Халқаро конгресс марказида Ўзбекистонда китобхонликни ривожлантириш бўйича умуммиллий ҳаракатга старт бериш маросимида иштирок этди.

Бирлашган Араб Амирликларида 2015 йилда Шайх Муҳаммад бин Рашид Ол Мактум ташаббуси билан бошланган “Араб китобхонлик танлови” дастури бугунги кунда жаҳондаги энг йирик маърифий ҳаракатлардан бирига айлангани қайд этилди. 

Қисқа вақт ичида ушбу ташаббус 200 миллиондан ортиқ ўқувчини қамраб олган.

Ўзбекистон ва Бирлашган Араб Амирликлари ўртасидаги яқин дўстлик ва стратегик шериклик доирасида ушбу ғояни янги босқичга олиб чиқишга қарор қилинди.

Шу мақсадда “Миллий китобхонлик ҳаракати” дастури бошланмоқда. Президент куни кеча ушбу дастурни давлат миқёсида фаол қўллаб-қувватлаш бўйича алоҳида фармойиш имзолаганини қайд этди.

“Китоб ўқийдиган одам теран ва соғлом фикрлайди. Бундай тафаккурга эга инсон эса жамиятни ўзгартира олади”, – деди Президент.

Эндиликда ҳар йили мазкур тадбирнинг финал босқичи Президент даражасида ўтказилади. 

Дастурнинг умумий йиллик мукофот фонди 240 минг долларни ташкил этади. Бош соврин соҳиби 50 минг доллар билан тақдирланади.

Мазкур ҳаракат мамлакатимизнинг барча ҳудудларини қамраб олади. Унда умумтаълим мактабларининг 1-синфдан 11-синфгача бўлган ўқувчилари иштирок этиши мумкин.