Миллий сертификат имтиҳони учун жой муаммоми?

Миллий сертификат имтиҳонларига рўйхатдан ўтишда талабгорлар учун янги тартиб амал қилмоқда. Энди фақат ариза топшириш муддати эмас, балки имтиҳон ўтказиладиган ҳудуддаги мавжуд ўринлар сони ҳам муҳим ҳисобланади.

Вазирлар Маҳкамасининг 2026 йил 29 июлдаги 411-сон қарорига мувофиқ, Билим ва малакаларни баҳолаш агентлиги имтиҳон ўтказиладиган жой, ҳудудлар кесимидаги ўринлар сони ва имтиҳон саналарини белгилайди.

Шунинг учун муайян ҳудуддаги ўринлар тўлиб қолса, умумий рўйхатдан ўтиш муддати ҳали давом этаётган бўлса ҳам талабгорлар ушбу ҳудудни танлаб рўйхатдан ўта олмайди.

4 ойда қарийб 500 мингта ўрин

Агентлик маълумотига кўра, 2026 йилнинг сентябрь-декабрь ойларида миллий сертификат имтиҳонлари учун 496 303 та ўтириш ўрни ажратилган.

Уларнинг ойлар кесимидаги тақсимоти қуйидагича:

• сентябрь — 125 753 та;
• октябрь — 129 535 та;
• ноябрь — 112 335 та;
• декабрь — 128 680 та.

Шу даврда жами 15 та имтиҳон ўтказилиши режалаштирилган.

Математика, кимё, география, биология, физика, она тили ва адабиёт ҳамда тарих фанларидан иккитадан, ҳуқуқшуносликдан эса битта имтиҳон ўтказилади.

2025 йилнинг худди шу даврида эса 11 та имтиҳон ташкил этилиб, уларда 255 217 нафар талабгор иштирок этган.

Нега ўринлар чекланган?

Агентлик бу тартиб талабгорлар сонини сунъий равишда чеклаш учун жорий этилмаганини билдирган.

Ҳудудлар бўйича ўринлар сонини белгилашда имтиҳон ўтказиладиган бинолар, техник жиҳозлар, ходимлар салоҳияти ҳамда тест жараёнини назорат қилиш имкониятлари ҳисобга олинади.

Агентликка кўра, бу орқали имтиҳонлардаги юкламани ҳудудлар бўйича тақсимлаш, талабгорлар учун зарур шароитларни таъминлаш ва натижаларни белгиланган муддатларда эълон қилиш имкони яратилади.

Талабгорлар нимага эътибор бериши керак?

Янги тартибдан келиб чиқиб, рўйхатдан ўтишнинг сўнгги кунига қолдирмаслик муҳим. Чунки танланган ҳудуддаги ўринлар муддатидан олдин тугаб қолиши мумкин.

Шунинг учун имтиҳонда иштирок этишни режалаштирган талабгорларга рўйхатдан ўтиш муддатлари билан бирга ўзлари танлаган ҳудуддаги бўш ўринларни ҳам мунтазам текшириб бориш тавсия этилмоқда.