Суюқ совун хариди: таълим тизимида 1,1 млрд сўмлик маблағ талон-торожи аниқланди

Самарқанд вилоятида мактабгача ва мактаб таълими тизимида 1,1 млрд сўмлик бюджет маблағлари талон-торож қилингани аниқланди. 
Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Департаментнинг Самарқанд вилояти бошқармаси томонидан ўтказилган терговга қадар текширувда вилоят мактабгача ва мактаб таълими бошқармасининг масъул шахслари 90 минг 863 дона суюқ совунни қиммат нархларда харид қилгани аниқланган.

Маълум қилинишича, ушбу харидлар натижасида 1,1 млрд сўмлик бюджет маблағлари ўзлаштириш ёки растрата йўли билан талон-торож қилинган.

Ҳолат юзасидан Жиноят кодексининг 167-моддаси — ўзлаштириш ёки растрата йўли билан талон-торож қилиш бўйича жиноят иши қўзғатилган.

Айни пайтда ҳолат юзасидан тергов ҳаракатлари олиб борилмоқда.

Муаллиф: Ҳасанбой ОЧУН