Самарқандда ШҲТ Плюс форматидаги илк экспертлар мулоқоти бошланди

Тадбирда ШҲТга аъзо давлатлар, кузатувчи мамлакатлар ва мулоқот бўйича ҳамкор давлатларнинг махсус хизматлари раҳбарлари ҳамда вакиллари, халқаро ташкилотлар вакиллари ва таклиф этилган меҳмонлар қатнашмоқда.

Тадбир аввалида Ўзбекистон Президенти Шавкат Мирзиёевнинг халқаро мулоқот иштирокчиларига йўллаган мурожаатини Президент ҳузуридаги Хавфсизлик кенгаши котиби В. Маҳмудов ўқиб эшиттирди.

Давлат раҳбари ўз мурожаатида замонавий таҳдидларнинг табиати ўзгариб бораётгани, рақамли технологиялар, сунъий интеллект ва глобал коммуникация воситаларининг ривожланиши янги имкониятлар билан бирга хавфсизлик соҳасида жиддий муаммоларни ҳам юзага келтираётганини таъкидлади.

Президентнинг қайд этишича, бугунги кунда киберхавфсизлик, муҳим инфратузилмаларни ҳимоя қилиш ва давлатларнинг бузғунчи таъсирларга қарши барқарорлигини таъминлаш долзарб масалаларга айланмоқда. Кибермакон эса анъанавий усуллар билан бир қаторда тармоқ ҳужумлари, жамоатчилик онгини бошқариш ва ёлғон ахборот тарқатиш воситалари қўлланилаётган майдонга айланмоқда.

Алоҳида таъкидланганидек, террорчи ташкилотлар интернет платформаларидан радикал ғояларни тарғиб қилиш, янги тарафдорларни жалб этиш, маблағ тўплаш ва давлат чегараларини тан олмайдиган экстремистик бирлашмаларни шакллантириш учун фойдаланмоқда.

Бундай жараёнларда, айниқса, ёшлар заиф қатламга айланмоқда. Бузғунчи кучлар уларнинг онгига мақсадли таъсир ўтказиб, ижтимоий зиддиятлардан фойдаланмоқда ва тоқатсизлик ғояларини тарқатмоқда. Бу эса миллатлараро ва динлараро тотувликка путур етказиб, ижтимоий-сиёсий вазиятни беқарорлаштириши мумкин.

Шу муносабат билан таҳдидларга фақат тезкор жавоб қайтариш эмас, балки уларнинг олдини олиш, хавф-хатарларни эрта аниқлаш, ўзаро ахборот алмашиш ва хавфсизлик соҳасидаги миллий салоҳиятни мустаҳкамлаш зарурлиги таъкидланди.

«Ҳеч бир давлат чегара билмайдиган таҳдидларга якка ўзи тўлиқ қарши тура олмайди», дейилади Президент мурожаатида.

Шавкат Мирзиёев ШҲТнинг халқаро ва минтақавий хавфсизликни таъминлашдаги ўрнига ҳам тўхталди. Бу йил ташкилот ташкил этилганига 25 йил тўлаётганини қайд этиб, ШҲТ чорак аср давомида хавфсизлик бўйича қўшма ёндашувларни ишлаб чиқишда самарали майдонга айланганини таъкидлади.

Ўзбекистон ШҲТнинг ҳаммуассиси сифатида ташкилотнинг барқарорликни сақлаш ва инклюзив тараққиётни таъминлашга хизмат қилувчи кўп томонлама платформа сифатидаги ролини янада кучайтириш ҳамда фаолиятини кенгайтиришга алоҳида аҳамият қаратмоқда.

Президентнинг фикрича, ШҲТнинг янги таҳдидларга ўз вақтида жавоб бериш ва барқарор дунёни шакллантиришдаги самарали иштироки кўп жиҳатдан махсус хизматларнинг яқин ҳамкорлигига боғлиқ.

Мурожаатда Самарқанддаги мулоқот иштирокчилари долзарб таҳдидларни ҳар томонлама муҳокама қилиш билан бирга халқлар хавфсизлиги ва давлатларнинг барқарор ривожланишини таъминлашга қаратилган амалий ҳамкорлик йўналишларини белгилаб олишига ишонч билдирилди.

Маълумот учун, ШҲТ Плюс форматини йўлга қўйиш ташаббуси Ўзбекистон Президенти Шавкат Мирзиёев томонидан илгари сурилган. Бу таклиф илк бор 2024 йилда ШҲТнинг Остона саммитида билдирилган эди. 2025 йилда Тяньцзинда ўтказилган ШҲТга аъзо давлатлар раҳбарлари кенгаши йиғилишида Хавфсизлик масалалари бўйича ШҲТ Плюс форматидаги биринчи экспертлар мулоқотини Самарқандда ўтказиш таклиф қилинган.