Литва ҳукумати Марказий Осиёдан келган муҳожирлардан хавотирга тушмоқда

Давлат хавфсизлик департаменти раҳбари Дарюс Яунишкисга кўра, 2021 йилдан бери Литвада Марказий Осиёдан келган муҳожирлар сони 14 бараварга кўпайган. Бу эса одамларнинг радикаллашишга мойиллиги билан боғлиқ хавотирларни келтириб чиқармоқда.

"Департамент мамлакатга келган барча муҳожирларни текширишга улгурмаяпти, бу эса контрразведка ва терроризмга қарши кураш соҳасида катта хавф туғдирмоқда. Айни пайтда биз мигрантларда ўзини намоён қилиши мумкин бўлган таҳдидни кўрмаяпмиз, аммо антисемитизм ва ғарбга қарши кайфиятлар билан бирга радикаллашув тенденцияси уларда мавжуд", деди у.

Мамлакат Бош вазири Ингрида Шимоните ҳам "Ziniu radijas" радиосида берган интервьюсида Россия – Украина уруши бошланишидан аввал мамлакат меҳнат бозорини Украина ҳамда Белорусдан келган эркак мигрантлар эгаллаганини, аммо урушда уларнинг жалб қилиниши ортидан меҳнат бозори бўшаб қолганини, шундан сўнг Марказий Осиёдан келганлар бу бозорни тўлдирганини айтган. 

Литва Миграция департаменти маълумотларига кўра, жорий йилнинг 1 октябрь ҳолати бўйича, Литвада 10,6 минг нафар Ўзбекистон фуқароси истиқомат қилади (бу рақамлар Литвада йил бошида 8,2 минг, 2022 йил бошида эса, 998 нафар бўлган). 

Литвадаги энг катта хорижий диаспора сифатида украинлар (77,5 минг киши), иккинчи ўринда белоруслар (61,3 минг киши) ва учинчи ўринда руслар (15,3 минг киши) қайд этилган. Тўртинчи ўринни эса ўзбеклар эгаллаган. Шунингдек, мамлакатда тожик диаспораси ҳам тўққиз ой ичида 5,7 мингдан 7,2 минг нафарга кўпайган.

Дарюс Яунишкис мамлакат фуқароларига бу рақамларлардан қўрқмаслик кераклигини, бунга сабаб сифатида мигрантлар сонининг ўсишига қарамай муҳожирларнинг умумий сони ҳали ҳам кам фоизни ташкил қилаётганлигини айтиб ўтган. У телеканалда берган интервьюси давомида жорий йил бошидан 1 октябрга қадар Литвада вақтинчалик яшаш учун рухсатнома олган муҳожирларнинг сони бор-йўғИ бир неча юз кишини ташкил қилишини таъкидлаган.